सेमिफाइनलबाट बाहिरिन लागेको पाकिस्तानविरुद्ध वीरेन्द्र सहवागको ‘छुद्र’ टिप्पणी

काठमाडौं । भारतीय पूर्वक्रिकेटर वीरेन्द्र सहवाग आफ्नो जमानाका आक्रामक ब्याट्सम्यान थिए । क्रिकेटबाट उनले संन्न्यास लिएको लामो समय भइसकेको छ । आजभोलि उनको आक्रामकता सामाजिक सञ्जालमा पोखिन्छ ।

सहवाग सामाजिक सञ्जालमा अन्य टीम र खेलाडीहरुलाई घोचपेच र आलोचना गर्न कुनै कसर छोड्दैनन् । अझ भारतको चीर प्रतिद्वन्द्वी पाकिस्तानलाई त उनी देखी सहँदैनन् । आजै उनले लेखेका दुई वटा ट्विटले पाकिस्तानप्रति सहवागको नकारात्मकता राम्रैसँग अभिव्यक्त भएको छ ।

पाकिस्तानले सेमिफाइनल खेल्न नपाउने निश्चितप्राय भएपछि सहवागले ट्विट गर्दै लेखेका छन्, ‘पाकिस्तान जिन्दा भाग । हेभ अ सेफ फ्लाइट ब्याक होम ।’

यससँगै उनले बाइबाइ पाकिस्तान लेखिएको फोटो पनि पोस्ट गरेका छन् । पाकिस्तानविरोधी भारतीयहरु सहवागको ट्विट पढेर नरमाउने कुरै भएन । उनीहरुले समर्थन गरेपछि सहवागले झनै हौसिएर अर्को पोस्ट पनि गरे ।

त्यसमा उनी लेख्छन्, ‘पाकिस्तानको खास विशेषता यो हो कि जुन टीमलाई पाकिस्तानले समर्थन गर्छ, त्यस टीमले पनि पाकिस्तानै जस्तो खेल्न थाल्छ । सरी श्रीलंका ।’