प्रदर्शक र निर्माताबीच सम्झौता : निर्माताले निरन्तर ५० प्रतिशत पाउने, ३ मिनेटको ट्रेलर सित्तैमा बज्ने

काठमाडौं । चलचित्र संघ र निर्माता संघबीच आज नेपाली फिल्म हलहरुमा चलुन्जेल ५० प्रतिशत शेयर पाउने सहमति भएको छ । चलचित्र संघका अध्यक्ष वीरेन्द्रनारायण श्रेष्ठ र निर्माता संघका अध्यक्ष नवल खड्काबीच बिहीबार यस्तो सम्झौता भएको हो ।

सम्झौताअनुसार गएको कात्तिक २४ गतेदेखि प्रदर्शनमा आएका नेपाली चलचित्रले हलहरुमा चलुन्जेल ५० प्रतिशत शेयर पाउनेछन् । यसअघि नेपाली चलचित्रका निर्माताले तेस्रो हप्ताबाट ३५ प्रतिशत मात्रै शेयर पाउने गरेका थिए । गएको बुधबार र बिहीबार दुई दिनसम्म चलेको वार्तापछि हल सञ्चालकहरु आफूहरुको मागमा सहमत हुन तयार भएको ‘दिमाग खराब’का निर्माता रौनक विक्रम कँडेलले जानकारी दिए ।

शेयर बाँडफाँड ५०-५० प्रतिशतको अलवा चलचित्र संघ र निर्मातासँगबीच अन्य सहमति पनि भएको छ । निर्माता कँडेलका अनुसार अबदेखि चलचित्र हलमा लाग्नुअघि नेपाली फिल्मको तीन मिनेटसम्मको ट्रेलर १५ दिनसम्म हलले सित्तैमा बजाइदिनेछ । यसअघि डेढ मिनेटको ट्रेलर मात्रै हलले बजाइदिने गरेको थियो । साथै हलहरुमा पोस्टर लगाउन निर्माताहरुले हल सञ्चालकलाई पैसा तिर्नुपर्ने अवस्था थियो । अबदेखि पोस्टर टाँस्न पनि पैसा तिर्नु नपर्ने भएको छ ।

निर्माता कँडेलले भने, ‘दिमाग खराबले उठाएको मुद्दालाई उहाँहरुले अहिले सम्बोधन गर्नुभएको छ । यसले सिंगो नेपाली फिल्मलाई नै फाइदा पुर्याउने छ । कम्तीमा हामी निर्माताहरुलाई ठूलो रहत महसुस भएको छ ।’

गएको कात्तिक २९ गते ‘दिमाग खराब’ टीमले हलहरुमा शो बाँडफाँडमा अन्याय भएको भन्दै आफ्नो फिल्म हलबाट उठाउने चेतावनी दिएका थिए । आफूहरुले तेस्रो हप्ता पनि ५०-५० प्रतिशत शेयर पाउनुपर्ने, विदेशी फिल्म बराबर शो पाउनुपर्ने । यदि नपाएको खण्डमा फिल्मलाई हलबाट निकालेर प्रदर्शनका लागि वैकल्पिक माध्यम खोज्न बाध्य हुने बतार्एका थिए ।