जनकपुर न्यूरो अस्पतालमा बालकको मृत्यु घटना : १० लाखमा मिलापत्र

जनकपुरधाम । उपचारमा लापरबाहीका कारण बालकको मृत्यु भएको भन्दै परिवार आन्दोलित भएपछि जनकपुर न्यूरो अस्पतालले १० लाख रूपैयाँ दिएर मिलापत्र गरेको खुलेको छ ।

उपचारमा लापरबाही गर्ने चिकित्सकलाई कानूनबमोजिम कारबाही गरिनुपर्नेमा प्रहरी प्रशासनकै रोहबरमा पीडित परिवारलाई थामथुम पारिएको भन्दै आलोचनासमेत बढेको छ ।

अस्पतालमा उपचारपछि डिस्चार्ज भएलगत्तै धनुषाको धनुषाधाम नगरपालिका-६ मालटोलका विक्रम कालीकोटेका ४ वर्षीय छोरा जेम्सको मृत्यु भएको थियो ।

डाक्टरको लापरबाहीले बालक जेम्सको मृत्यु भएको भन्दै उनका आफन्तले घटनाको छानबिन, दोषीमाथि कारबाही र क्षतिपूर्ति माग गर्दै शव बुझ्न मानेका थिएनन् ।

बालकका आफन्त वीरबहादुरले क्रिया खर्चबापत १० लाख रूपैयाँ दिने सर्तमा मिलापत्र भएको जानकारी दिए ।

‘१० लाखको चेक दिएपछि राति नै शव बुझ्यौं’, उनले भने ।

जिल्ला प्रहरी प्रवक्ता डीएसपी रञ्जन अवाले मृतकका परिवार र अस्पतालबीच राति नै सहमति भएको बताए । सहमति के सर्तमा भएको कुरा थाहा नभएको र मृतकको शव राति नै परिवारले लगेको उनको भनाई छ ।