प्रश्न व्यवस्थामा होइन, हाम्रो काम गर्ने शैलीमा उठेको होः उपप्रधानमन्त्री खड्का (भिडिओ)

काठमाडौं । उपप्रधान तथा रक्षामन्त्री पूर्णबहादुर खड्काले सरकार र दलहरूले काम गर्ने तौरतरिकालाई सुधार गर्न जरुरी भएको बताएका छन् ।

राजधानीमा आयोजित एक कार्यक्रमलाई सम्बोधन गर्दै उनले प्रश्न व्यवस्थामाथि नभई राज्य सञ्चालकको काम गर्ने शैलीमा उठेको स्वीकारे ।

उनले भने, ‘प्रश्न व्यवस्थामा उठेको होइन । प्रश्न हाम्रो काम गर्ने शैलीमा उठेको हो । सुशासन र समय सापेक्ष जनताको चाहना र अपेक्षालाई केन्द्रविन्दुमा राखेर तीव्र गतिमा काम गर्ने तौरतरिकालाई सुधार गर्नुपर्ने जरुरी छ । अहिले भएका गतिविधिले त्यसतर्फ बढी केन्द्रित गराउन प्रेरित गरेका छन् ।’

नकारात्मक र भ्रमपूर्ण प्रचारले समाजलाई गलत दिशामा लगिरहेको भन्दै खड्काले त्यसतर्फ आफूहरू सजग र सुधार्नुपर्ने कुरामा सचेत रहेको पनि बताए ।

खड्काले थपे, ‘सरकारमा बसेर हामीले अरुलाई टिप्पणी गर्नुपर्ने भन्दा जनतालाई डेलिभरि दिने, सुशासनतर्फ अघि बढाउने गरी काम गर्दैछ । सरकारले केही दिनभित्रै जनताको सुशासनको चाहना र विभिन्न कोणबाट उठेका प्रश्नको जवाफ कामबाट दिन संगठित रूपमा लाग्नुछ ।’