मकवानपुरको थाहा नगरमा आजबाट ‘थाहा फिल्म फेस्टिभल’ हुँदै

हेटौँडा । उत्तरी मकवानपुरको थाहा नगरपालिकाको पर्यटन प्रवर्द्धन र थाहा लाई मिनी फिल्म सिटी बनाउने उद्देश्यको साथ आजबाट पहिलो थाहा फिल्म फेस्टिभल हुँदै छ ।

नगरपालिकामा क्रियाशील थाहा कला केन्द्रले पर्यटनका लागि फिल्म फेस्टिभल भन्ने नाराका साथ आजबाट मंसिर १५ सम्म फेस्टिभलको आयोजना गर्न लागेको हो ।

फेस्टिभलमा चलचित्र, लघु चलचित्र, म्युजिक भिडियो, भ्लग लगायत प्रदर्शन हुने आयोजकले जनाएको छ । थाहा नगरमा चलचित्र छायांकनको स्थल विकास तथा प्रचार गर्ने गरी आयोजकले विभिन्न पर्यटकीय स्थलमा चलचित्रकर्मीलाई भ्रमण समेत गराउने छ ।

थाहा नगरपालिकाको मुख्य पर्यटकीय क्षेत्रहरूको पहिचान गरी फेस्टिभलमा वृत्तचित्र प्रदर्शन गरिने आयोजक थाहा कला केन्द्रका सानुबाबु मोक्तानले बताए ।

चलचित्र छायांकनको लागि उपयुक्त स्थलहरूको बारेमा फेस्टिभलमा आएका चलचित्र निर्माता, निर्देशक तथा कालाकारहरूलाई जानकारी दिनेगरी वृत्तचित्र तयार पारिएको मोक्तानको भनाई रहेको छ ।

कार्यक्रम अवधिभर थाहाको पर्यटकीय क्षेत्रको अवलोकन गर्ने थाहा नगरको पर्यटन बढाउने तस्बिरहरू कार्यक्रम स्थलमा राखी अवलोकन गराइनेछ ।

यसै गरी चलचित्र, लघु चलचित्र, म्युजिक भिडियो, भ्लग तथा इत्यादिका निर्माता, निर्देशक, कलाकार तथा निर्माण पक्षलाई थाहा नगरपालिकासँग पारस्परिक गराउन प्रयास गर्ने आयोजकले जनाएको छ ।

चलचित्र, लघु चलचित्र, म्युजिक भिडियाको निर्माता, निर्देशक तथा निर्माण समूहसँग विशेष अन्तरक्रिया गराइनेछ । मकवानपुर जिल्लामै पहिलो पटक फिल्म फेस्टिभलको आयोजना हुन लागिरहेकोले फेस्टिभलका विशेष आकर्षक हुने आयोजकको दाबी छ ।

फेस्टिभवलमा विभिन्न समूहबाट सहभागी भई आएका सामग्रीहरूबाट छानिएका डकुमेन्ट्री, फिचर फिल्म र सर्ट फिल्महरूको प्रदर्शनी हुने बताइएको छ । कार्यक्रमको कुल लागत २७ लाख ८० हजार लाग्ने अनुमान गरिएको छ ।

फेस्टिभलमा डोसान, राधा, बुलबुल प्रकाश लगायतका नेपाली चलचित्र प्रदर्शन गरिने आयोजकको भनाई छ । प्रतियोगिता अवधिभर सयौँको संख्यामा नेपाली चलचित्रका कलाकार, निर्माता तथा निर्देशकहरू आएर थाहा क्षेत्रको अवलोकन गर्ने विश्वास आयोजकको रहेको छ ।