नवलपरासीको विवादबारे केन्द्रमा गम्भीर छलफल भएको छ, समस्या सल्टाउन म आफै‌ आउँछु: शेखर कोइराला (भिडिओ)

परासी । नेपाली कांग्रेसका नेता डा. शेखर कोइरालाले नवलपरासीमा पार्टीभित्र देखिएको विवाद समाधान गर्न आफू तयार भएको बताएका छन् ।

शुक्रबार परासीमा संस्थापन पक्षका नेताहरुसँगको छलफलमा उनले नवलपरासीको विवादका बारेमा पार्टीको पदाधिकारी तहमा गम्भीर छलफल भएको बताए ।

नवलपरासीमा एकलौटी रुपमा आयोजना गरिएको जिल्ला सम्मेलन संस्थापन पक्षसहित अधिकांश नेता कार्यकर्ताहरुले बहिष्कार गरेपछि नेता कोइरालाले उनीहरुसँग छलफल गरेका हुन् ।

पार्टी विधानअनुसार तल्लो तहबाट सम्मेलन गर्दै जिल्ला सम्मेलन गर्नुपर्ने भए पनि नवलपरासीमा जिल्ला सभापतिले एक पक्षीय रुपमा जिल्ला सम्मेलनको आह्वान गरेपछि अधिकांश नेता कार्यकर्ताहरु रुष्ट छन् ।

जिल्ला सम्मेलनको उद्घाटन गर्न गएका कोइरालाले परासीमा संस्थापन पक्षका नेताहरुसँग छलफल गरेका हुन् । उनले भने, ‘नवलपरासीको विषयमा पदाधिकारी बैठकमा गहन छलफल भएको छ । यी कुराहरु म केन्द्रमा पनि राख्छु । कांग्रेस एउटै पार्टी हो । मासबेस पार्टी भएकाले यस्ता समस्याहरु आउँछन् । केन्द्रले केन्द्रीय सदस्यहरुलाई विवाद समाधानका लागि पठाउने प्रचलन थियो । यसपटक पनि यो विषयमा केन्द्रले कोही पदाधिकारी साथीलाई पठाउला । कोही नआए म आफैं आएर पनि समस्या सल्टाउँछु ।’

नेता कोइरालाले असन्तुष्ट नेता कार्यकर्ताहरुलाई जिल्ला सम्मेलनमा सहभागी हुन र पार्टी एक ढिक्का भएको सन्देश जिल्लामा दिन आग्रह गरे ।

‘मेरो आग्रह छ कि तपाईंहरु पनि हिँड्नुस् । सम्मेलनमा सहभागी हुनुस् । पार्टी एक ढिक्का भएको सन्देश पनि जान्छ’, उनले भने, ‘जिल्लामा पार्टी एक ढिक्का भएको महसुस तपाईंहरुले गराउनुपर्‍यो । निर्वाचन २०८४ मै हुन्छ । २०८४ बाट २०८५ मा सर्दैन । मध्यावधिको पनि चर्चा सुरु भएको छ। तर, त्यो सम्भावना छैन । हल्लामात्रै हो । २०८४ मै निर्वाचन हुन्छ । त्यसको तयारी पनि जिल्ला सम्मेलनले नै गर्छ ।’

उनले सम्मेलनमा सहभागी भएर आफ्ना कुरा राख्न नेताहरुलाई आग्रह गरे । तर, नेताहरुले एक पक्षीय र विधानविपरीत आयोजना गरिएको सम्मेलनमा सहभागी हुन नसकिने प्रस्ट पार्दै सम्मलेन बहिष्कार गरे ।

छलफलमा केन्द्रीय सदस्य एवं नपलपरासीका पूर्वजिल्ला सभापति देवेन्द्रराज कँडेल, संविधानसभा सदस्य एवं प्रदेशसभा सदस्य देवकरण कलवार, प्रदेशसभा सदस्य एवं महाधिवेशन प्रतिनिधि बैजनाथ कलवार, प्रतिनिधिसभा क्षेत्र नं १ का सभापति मुकुल आचार्य, प्रतिनिधिसभा क्षेत्र नं २ सभापति माधवप्रसाद पाण्डे, प्रतिनिधिसभा क्षेत्र नं २ को प्रदेशसभा (ख)का सभापति रामचन्द्र साहनी, तरुण दल जिल्ला सभापति, महिला संघ, मुस्लिम संघलगायत विभिन्न पालिका सभापतिहरु सहभागी थिए ।

उनीहरुले जिल्ला सम्मेलन पार्टीको विधानसम्मत नभएको, सम्मेलनका सम्बन्धमा मातहतका क्षेत्रीय, नगर, गाउँ समितिसँग छलफल र परामर्श नगरी एकलौटी आयोजना गरिएको दाबी गरेका छन् ।

साथै तल्लो तहतबाट अधिवेशन नगराई एकै पटक कुनै छलफलविनै जिल्ला सम्मेलन आयोजना गरिएको, जिल्लाबाट प्रतिनिधित्व गर्ने पार्टी केन्द्रीय सदस्य देवेन्द्र कँडेल र केन्द्रीय सदस्य एवं प्रतिनिधिसभा सदस्य विनोद चौधरीसँग सल्लाह, सुझाव, परामर्श र निमन्त्रणा नगरेको उनीहरुको भनाइ छ ।

जिल्लास्थित पार्टीका भ्रातृ संस्थाहरुलाई पनि निमन्त्रणा नगरेको भन्दै जिल्लाका नेताहरुले पार्टी सभापतिलाई लिखित जानकारी गराएका छन् ।