हवाई सुरक्षा व्यवस्थित बनाएर कालोसूचीबाट हटाउने प्रयासमा छौँ : प्रधानमन्त्री

काठमाडौं। प्रधानमन्त्री पुष्पकमल दाहाल ‘प्रचण्ड’ले नेपालको हवाई सुरक्षालाई व्यवस्थित बनाएर युरोपेली युनियनको कालोसूचीबाट नेपालको हवाई क्षेत्र हटाउन सरकार निरन्तर प्रयत्नशील रहेको बताएका छन् ।

बिहीबार बिहान राष्ट्रिय स्वतन्त्र पार्टीका कार्यवाहक सभापति डोलप्रसाद अर्यालको नेतृत्वमा आएको प्रतिनिधिले बुझाएको ज्ञापन पत्र बुझ्दै प्रधानमन्त्रीले सो कुरा बताएका हुन् ।

राष्ट्रिय स्वतन्त्र पार्टीको प्रतिनिधिमण्डलले युरोपेली युनियनले नेपालको हवाई क्षेत्रलाई कालोसूचीबाट नहटाएकोमा नेपाल नागरिक उड्डयन प्राधिकरण गम्भीर हुनुपर्ने, नयाँ जहाज खरिद प्रकरण पारदर्शी हुनुपर्ने लगायतका विषयमा प्रधानमन्त्रीको ध्यानाकर्षण गराएको थियो।

प्रतिनिधिमण्डलसँगको कुराकानीमा प्रधानमन्त्रीले नेपालको हवाई क्षेत्रलाई कालोसूचीबाट हटाउन आफूले निरन्तर प्रयास गरिरहेको र थप सुधारमार्फत कालोसूचीबाट हटाउन विश्वासको वातावरण सिर्जना गरिने बताए ।

उनले भने, ‘मैले युरोपेली युनियनका प्रतिनिधिहरूसँग पनि यस विषयमा कुराकानी गरेको छु। संस्कृति, पर्यटन तथा नागरिक उड्डयन मन्त्रालय र नागरिक उड्डयन प्राधिकरणका पदाधिकारीहरूसँग पनि पटक पटक छलफल गरेको छु। हवाई सुरक्षा हाम्रा निम्ति एउटा चुनौतीको विषय बन्दै आएको छ, यसले अन्तर्राष्ट्रिय जगतमा पनि नेपालको छविमाथि प्रश्न उठ्न सक्छ। त्यसैले म गम्भीर छु।’

यो पटक हवाई सुरक्षामा केही सुधार भएकाले कालोसूचीबाट हट्ने विश्वास प्रधानमन्त्रीले व्यक्त गरे ।

उनले भने, ‘हाम्रो सुधार पर्याप्त भएन। थप सुधारका निम्ति काम गर्नुपर्ने परिस्थिति देखिएको छ। तपाईँहरूले दिएका सुझाव महत्त्वपूर्ण छन्। नियामक निकायहरूसँग थप छलफल गरेर परिणाममुखी नतिजाको प्रयास हुनेछ।’

रास्पाका कार्यवाहक सभापति अर्यालको नेतृत्वको टोलीले त्रिभुवन अन्तर्राष्ट्रिय विमानस्थलको ग्राउण्ड ह्याण्डलिङमा प्राधिकरणको निर्णय, ईयूको ‘सेफ्टी लिस्ट’ र नेपालको कमजोरी तथा निगमको नयाँ विमान खरिदका विषयमा प्रधानमन्त्री पुष्पकमल दाहाल ‘प्रचण्ड’मार्फत सरकारको ध्यानाकर्षण गराएको प्रतिनिधि सभा सदस्यसमेत रहेकी रास्वाका केन्द्रीय सदस्य निशा डाँगीले नेपाल प्रेसलाई जानकारी दिईन । उनका अनुसार तीन वटै विषयको संवेदनशीलता बुझेर सकारात्मक पहलकदमीसहित तत्काल आवश्यक निर्णय लिन र आवश्यक निर्देशन दिन रास्वपाले आग्रह गरेको छ ।

ध्यानाकर्षण पत्र बुझाउने कार्यक्रममा प्रतिनिधि सभा सदस्य एवम पार्टीका केन्द्रीय सदस्य सोविता गौतम, असिम साह, गणेश पराजुली, शिशिर खनाल, विनिता कठायत, लक्ष्मी तिवारी लगायतको सहभागिता रहेको थियो ।