नेपालमा बसेर काम छैन भन्दै गर्न खोज्नेलाई गाली गरेर विदेश जाने फेसन बन्दैछ : प्रचण्ड (भिडिओ)

काठमाडौं । प्रधानमन्त्री पुष्पकमल दाहाल ‘प्रचण्ड’ ले आफूले कार्यकाल सम्हालेको एक वर्षपछि राष्ट्र र जनताको निम्ति नयाँ योजना बनाएको बताएका छन् ।

ललितपुर महानगरको स्थापना दिवस समारोहलाई सम्बोधन गर्दै उनले नयाँ ढंगले काम गर्ने सोचिरहेको बताए ।

प्रचण्डले भने, ‘मैले सरकारको नेतृत्व गरेको एक वर्ष पुग्दैछ । एकवर्षपछि मैले नयाँ ढंगले काम गर्ने सोच्दैछु राष्ट्र र जनताको निम्ति । मैले गरेको सकारात्मक प्रयासलाई साथ नपाएको पीडा मैले महसुस गरेको छु ।’

सडकमा अहिले संविधान, गणतन्त्र र संघीयताविरुद्ध गालीगलौज गर्नेहरूको भाषा प्रयोग गरेर देशलाई अँध्यारोतिर फर्काउने षड्यन्त्र भइरहेको उनको दाबी छ । अहिले संविधान र गणतन्त्रलाई निस्तेज पार्न चलखेल भइरहेको पनि प्रधानमन्त्रीले बताए ।

अहिले नेपाली युवा तथा शिक्षित समुदाय विदेश जाने कुरा चिन्ताको विषय भएको भन्दै प्रचण्डले भने, ‘यो विकास र रोजगार नभएर मात्रै बाहिरिएको भन्ने कुरामा आशिंक सत्यता छ । हामीले रोजगारी सिर्जना जति गर्नुपर्ने थियो त्यो । विकास निर्माण पनि जति गर्नुपर्नेथ्यो सकेनौं । तर, यही कारणले मात्रै विदेश गएका भन्ने कुरामा पूरै सत्य छैन ।’

उनले घरकै खाना खाएर ७० हजार कमाउने शिक्षक करोडसम्म खर्च गएर विदेश गएको देखेपछि आफू अचम्भित भएको बताए ।

प्रधानमन्त्रीले भने, ‘पढेलेखेका मान्छेहरू विदेश जाने नेपालमा यति धेरै उर्बर जमिन छ । कहिले न कहिँ हामीभित्र देशभक्तिको भावना मर्दै गयो । यो सरकारलाई गाली गरेर भएको हो त यो ? आजभोलि नेपाल डुब्यो नेपालमा बसेर केही काम छैन भन्ने नेपालमा बस्नेहरूलाई गाली गर्ने फेसन बनेको छ ।’

उनले जागिर र सुविधा दिएर पनि देशमा नबस्ने फेशन रोक्नुपर्नेमा उनको जोड छ ।