प्रचण्डको कार्यव्यस्तताले माओवादी पदाधिकारी बैठक स्थगित

काठमाडौं । सत्तारुढ नेकपा माओवादी केन्द्रको पदाधिकारी बैठक स्थगित भएको छ । आज दिउँसो ३ बजे प्रधानमन्त्री निवास बालुवाटारमा बस्ने भनिएको बैठक भोलिसम्मका लागि स्थगित गरिएको कार्यालय मुख्यसचिव श्रीराम ढकालले बताए ।

प्रधानमन्त्रीसमेत रहेका पार्टी अध्यक्ष पुष्पकमल दाहाल प्रचण्डको कार्यव्यस्तताको कारणले बैठक सारिएको उनले बताए । उनका अनुसार बैठक भोलि बस्नेछ ।

हिजो बसेको बैठकमा केन्द्रीय कमिटीको बैठक र विधान सम्मेलनको मिति गर्नेबारे छलफल भएको थियो । बैठकमा पार्टीले सञ्चालन गरेको रुपान्तरण अभियान र सरकारको समीक्षालगायत समसामयिक विषयमा छलफल हुने जनाइएको छ ।

बैठकमा सातै प्रदेशका इन्चार्जले अभियानको समीक्षात्मक रिपोर्टिङ गरेका थिए ।