प्रधानमन्त्रीकाे आग्रह- कोशी प्रदेशको विवाद संवादबाटै समाधान खोजौं

काठमाडौं । प्रधानमन्त्री पुष्पकमल दाहाल प्रचण्डले कोशी प्रदेशमा नामकरणको विषयमा देखिएको असन्तुष्टि संवाद र छलफलको माध्यमबाटै समाधान गर्नुपर्ने जनाएका छन् । विराटनगर विमानस्थलमा बिहीबार संचारकर्मीसँग कुरा गर्दै उनले यो विषयमा बढ्दै गएको विवाद बिस्तारै कम हुँदै गएको बताए ।

‘नामको विषयमा आन्दोलनमा जाने साथीहरुलाई पनि भेटेर कुराकानी गरेको छु । यसलाई एक्स्ट्रिममा जान दिनुहुँदैन भन्ने छ । यो विषय सबै मिलेर छलफल गरेर संवादकै तरिकाले शान्तिपूर्ण ढंगले यसको समाधान गर्नुपर्छ । अतिवाद तिर जान दिनुहुँदैन,यसमा सबै गम्भीर हुनुपर्छ’ माओवादी केन्द्रका अध्यक्षसमेत रहेका दाहालले भने ।

आफ्नो पार्टीको नामबाट कम्युनिष्ट हटाउन लागेको भन्ने चर्चा गलत भएको बताउँदै उनले आफूले कहिल्यै त्यसो नभनेको जनाएका छन् । उनले नामका विषयमा छलफल भएको तर कम्युनिष्ट पार्टीको नाम हटाउने चर्चा अनावश्यक भएको बताए ।

उनले भने, ‘मैले कहिल्यै त्यसो भनेको छैन, पहिले पनि माओवादी मात्रै थियो, पछि केन्द्र थपियो, खाली माओवादी केन्द्रको ठाउँमा समाजवादी केन्द्र वा यस्तै केही हुनसक्छ । भेला, सम्मेलन, अधिवेशनबाट नेपाल कम्युनिस्ट पार्टी समाजवादी भन्ने पनि हुनसक्छ । हामी छलफलमा छौं, कम्युनिस्ट पार्टीको नाम कहिल्यै पनि परिवर्तन हुँदैन ।’

प्रधानमन्त्री प्रचण्डले आफूले सोचे अनुसार रिजल्ट दिन नसकेपनि असफल भने नभएको दावी गरे ।

‘मैले जति सोचेको हो, त्यसरी भयो भन्ने मेरो दाबी छैन । गठबन्धनको सरकार हो । धेरै सीमा अप्ठ्यारो हुन्छन् । सबैलाई मिलाएर लाने जिम्मेवारीको कुरा हो । तर, जे जति सुशासन, सामाजिक न्याय, विकास निर्माणको कुरा छ मेरो दाबी के हो भने सफल भएको छु भन्ने लागेको छ’, उनले भने–‘सरकारले सामाजिक न्याय, मिटरब्याज पीडित, नागरिकता समस्या हल भयो । भ्रष्टाचार र सुशासनको पक्षमा यो लेबलको कहिल्यै छलफल भएको थियो ? भू–माफियाविरुद्ध कदम चालिएको छ । अन्तर्राष्ट्रिय रुपमा पनि ऐतिहासिक रुपमा सफल छ । यो विषय सबैले मनन गर्नसक्नुपर्यो ।’

आफूले पुस लागेदेखि सामूहिक रुपले मन्त्रालयको ब्रिफिङ लिइरहेको बताउँदै प्रचण्डले ६ वटा मन्त्रालयको सकिएको बताए । ‘सबै मन्त्रालयको ब्रिफिङ लिएर समीक्षा गरिरहेको छु । अब नयाँ ढंगले जाने, विकास निर्माण र जनताको सेवा अगाडि बढाउने योजना बनाउने हो । अब टार्गेट दिइन्छ । त्यो अनुसार भएन भने सोच्नुपर्छ,अरु बाहिर कांग्रेसले यसो गर्यो उसो गर्यो भन्ने हल्ला मात्र हुन्’ उनले भने ।