फारवेष्ट पशुपति कप : ईलाईट र घोडाघोडी विजयी

कैलाली । कैलारी गाउँपालिका वडा नम्बर ६ को ईलाईट युवा क्लब र घोडाघोडी नगरपालिकाको घोडाघोडी युवा क्लबले एनआरएनए छैटौँ फारवेष्ट पशुपति कप २०८० फुटबल प्रतियोगितामा विजयी सुरुवात गरेका छन् ।

फारवेष्ट पशुपति युवा क्लबको आयोजनामा भइरहेको प्रतियोगिताको दोस्रो दिन भएका खेलमा जित हात पार्दै ईलाईट र घोडाघोडीले क्वाटर फाइनलमा स्थान बनाएका हुन् ।

धनगढी रङ्गशालामा भएको पहिलो खेलमा ईलाईट युवा क्लबले अलस्टार्स स्पोर्टस एकेडेमीलाई १–० ले हराउँदै अन्तिम आठमा पुगेको छ । ईलाईटको जितमा विदेशी खेलाडी फोफानाले एक मात्रै गोल पेनाल्टीको सहारामा गरे ।

दोस्रो हाफको २६ औँ मिनेटमा अलस्टार्सका सौगात मगरले ह्यान्ड गरेपछि पाइएको पेनाल्टीलाई विदेशी खेलाडी फोफानाले गोलमा परिणत गरे । उनी खेलको म्यान अफ द म्याच समेत बने । उनले नगद उनले नगद ५ हजार सहित ट्रफी पाएका छन् ।

धनगढी रङ्गशालामा भएको दोस्रो खेलमा घोडाघोडी युवा क्लबले टेकबहादुर चोखाल फाउन्डेसनलाई टाईब्रेकरमा ४–२ ले हराएर क्वाटर फाइनल प्रवेश गरेको हो । निर्धारित समय दुवै टोलीले दुई दुईको बराबरी खेलेका थिए ।

पहिलो हाफको १२ मिनेटमा गोल गर्दै घोडाघोडीले अग्रता लियो । पहिलो हाफकै १९ मिनेटमा टेकबहादुर चोखाल फाउन्डेसनका लागि ज्ञानु भण्डारीले गोल गर्दै खेल बराबरीमा पुराए ।

दोस्रो हाफको दोस्रो मिनेटमै टेकबहादुर चोखाल फाउण्डेसनकासुदीप धामीले गोल गर्दै आफ्नो टिमलाई २–१ म पुराए । दोस्रो हाफको १९ औ मिनेटमा फाउन्डेसनले आत्मघाती गोल खादै बराबरीमा आयो ।

पेनाल्टी सुटआउटमा फाउन्डेसनका ज्ञानु भण्डारी र राजेन्द्र प्रताप सिंहको पेनाल्टी प्रहारलाई घोडाघोडीका गोलरक्षक राजेन्द्र विष्टले बचाए ।

घोडाघोडीका लागि सुजित बुढाथोकी संजीव लामा माइकल शाही र करन रावतले पेनाल्टीलाई गोलमा परिणत गरे ।

फाउन्डेसनका लागि सुदिप विक र मदननाथ योगीले मात्रै गोल गरे । टिमलाई जित दिलाउन सफल घोडाघोडीका गोलरक्षक विक्रम विष्ट म्यान अफ द म्याच भए । उनले नगद उनले नगद ५ हजार सहित ट्रफी पाएका छन् ।

प्रतियोगिता अन्तर्गत पहिलो खेलमा ब्वाईज युनियन लम्की र नेपाल प्रहरी सुदूरपश्चिम प्रदेश तथा दोस्रो खेलमा पुर्नवास युनाईटेड र ग्रिन युथ क्लब प्रतिस्पर्धा गर्नेछन् ।

पहिलो खेल दिउँसो साढे १२ बजे र दोस्रो खेल साढे २ बजे धनगढी रङ्गशालामा हुनेछ । पुस १४ गतेसम्म धनगढी रङ्गशालामा हुने प्रतियोगितामा १५ टिमको सहभागी रहेको छ ।

प्रतियोगिताको विजेताले पाँच लाख र उपविजेताले २ लाख पाउने छन् । प्रतियोगिताको उत्कृष्ट खेलाडीलाई २५ हजार तथा विभिन्न विधाका उत्कृष्टले १५–१५ हजार रुपैयाँ पुरस्कार पाउने आयोजक फारवेष्ट पशुपति युवा क्लबका अध्यक्ष खेम रावतले बताए । प्रत्येक खेलको म्यान अफ द म्याचले पाँच हजार नगद पाउने छन् ।