युरोपमा खेल्ने खेलाडीभन्दा बढी गोल गर्ने खेलाडी बने साउदीको अल नासरबाट खेलिरहेका रोनाल्डो

काठमाडौं । साउदी प्रो लिग क्लब अल नासरका लागि खेलिरहेका क्रिस्टियानो रोनाल्डो सन् २०२३ मा युरोपका क्लबबाट खेल्ने खेलाडीले भन्दा बढी गोल गर्न सफल भएका छन् ।

रोनाल्डोले यो वर्ष ५३ गोल गरेका छन् । फ्रान्सको पेरिस सेन्ट जर्मन-पीएसजीका केलियन एमबाप्पे र जर्मनीको बायर्न म्युनिखबाट खेलिरहेका हेरि केनले समान ५२ गोल गरेका छन् । रोनाल्डोले जारी सिजन सबै प्रतियोगितामा गरी अल नासरका लागि ३० खेलमा २९ गोल गरेका छन् । त्यसमध्ये घरेलु लिगमा उनी १७ खेलमा १९ गोलसहित सर्वाधिक गोलकर्ता रहेका छन् ।

साउदी प्रो लिगमा मंगलबार राति अल इत्तिहादविरुद्ध रोनाल्डोले २ गोल गरेका थिए। दुवै गोल उनले पेनाल्टीमा गरेका हुन् । यो सिजन घरेलु लिगमा १८ खेलबाट ४३ अंक जोडेको अल नासर शीर्षस्थानमा रहेको अल हिलालभन्दा ७ अंकले पछाडि छ ।

रोनाल्डोले सन् २०२३ मा राष्ट्रिय टोलीबाट १० गोल गरेका छन् । एमबाप्पेले यो सिजन क्लबका लागि २२ खेलमा २१ गोल गरेका छन् भने सन् २०२३ मा राष्ट्रिय टोलीबाट १० गोल गरेका छन् । हेरि केनले यो सिजन क्लबका लागि २२ खेलमा २५ गोल गरेका छन् भने राष्ट्रिय टोलीबाट सन् २०२३ मा ९ गोल गरेका छन् ।