शीर्षस्थानमा उक्लने मौका पाएको आर्सनल घरेलु मैदानमै पराजित

काठमाडौं । इङ्लिस प्रिमियर लिग फुटबलअन्तर्गत बिहीबार राति दुई बलिया टोली आर्सनल र टोट्टनहाम पराजित भएका छन् ।

शीर्षस्थानमा उक्लने मौका पाएको आर्सनल घरेलु मैदानमै वेस्ट हामसँग २-० गोलले पराजित भयो । अर्को खेलमा टोट्टनहामले ब्रिघ्टनको मैदानमा ४-२ गोलको हार व्यहोर्‍यो ।

आर्सनलविरुद्ध वेस्टहामका लागि टोमस सुसेकले १३ र कन्सटाटिनोस माभ्रोपानोसले ५५ औँ मिनेटमा गोल गरेका थिए । आर्सनलले लिगका पछिल्ला चार खेलमा केवल एक जित हात पारेको छ । अन्य तीन खेलमा दुई हार र एक बराबरीको नतिजा निकालेको छ ।

१९ खेलबाट ४० अंक भएको आर्सनल शीर्षस्थानको लिभरपुलभन्दा २ अंकले पछाडि छ । समान खेलबाट एस्टन भिल्लाको ३९ र १८ खेल खेलेको म्यानचेस्टर सिटीको ३७ अंक छ ।

टोट्टनहामको १९ खेलबाट ३६ अंक छ । टोट्टनहामविरुद्ध ब्रिघ्टनका जोआ पेड्रोले २ गोल गरेका थिए । खेलमा ४-० गोलले पछाडि रहेको अवस्थामा टोट्टनहामले अन्तिम समयमा दुई गोल फर्काएको थियो । वेस्टहामको ३३ र ब्रिघ्टनको ३० अंक रहेको छ ।