यसकुमारले ल्याए नयाँ गीतको ट्रेलर, संवादले निम्तिन सक्छ विवाद

काठमाडौं । गायक यश कुमारले आफ्नो नयाँ गीत ‘तिमी छौ र त’ को ट्रेलर युट्यूवमा सार्वजनिक गरेका छन् । प्रेमभावको गीत भए पनि ट्रेलरमा समावेश गरिएका संवादहरुले विवाद निम्त्याउने निश्चित छ ।

यशकुमारले यसअघि ‘सुस्तरी… सुस्तरी…’ बोलको गीतमार्फत निकै प्रशंसा कमाएका थिए । नगरप्रहरीले सडक व्यापारीबीचको प्रेम देखाइएको उक्त गीतको भिडिओ सिर्जनात्मक थियो । उक्त गीतले एक करोडभन्दा बढी भ्यूज कमाइसकेको छ । तर, यो नयाँ गीतमा भने यशकुमारले धार्मिक र जातीय सद्भाव भड्काउने खालका संवादहरु राखेका छन् ।

सामान्यतया गीतको ट्रेलर ल्याउने चलन हुँदैन । एकैपटक गीत नै रिलिज गरिन्छ । तर, यशकुमारको उद्देश्य गीत आउनु पहिल्यै चर्चा र विवाद सिर्जना गर्ने देखिएको छ ।

१ मिनेट २४ सेकेन्डको ट्रेलर हेर्दा भिडियोको कथा एक ब्राम्हण युवक र जनजाती समुदायकी युवतीबीचको अन्तरजातीय प्रेम सम्वन्धमा बुनिएको छ । भिडिओमा केटा र केटीका बाबुले जात र धर्मलक्ष्यित आपत्तिजनक शब्दहरु बोलेका छन् ।

केटीका बुवाले भन्छन्, ‘तँ सुँगुरको मासु खानेकी छोरीलाई घरमा भित्र्याएर मेरो संस्कारलाई जुठो बनाउँछु रु’

केटाका बुवाले जवाफ दिन्छन्, ‘तँ पशुको मु… खाने चोखो, म मासु खाने जुठो रु’ त्यसपछि उनले सुँगुरको टाउको बोकेर केटाका बुवालाई लखेट्दै जातीयरुपमा अनर्गल शब्दहरु बोलेका छन् ।

गीतका शब्दहरु यश कुमारकै हुन् भने कम्पोज पनि उनकै हो । भिडिओलाई विज्ञान राईले निर्देशन गरेका छन् । यसअघि ‘सुस्तरी सुस्तरी’ बाट चर्चा कमाएकी अनु थापाले भिडिओमा यश कुमारकी प्रेमिकाको रुपमा अभिनय गरेकी छन् ।