‘बेहुली फ्रम मेघौली’मा निश्चल-स्वस्तिमा

काठमाडौं । ‘दिमाग खराब’ लेखक आकाश बरालले सिनेमा निर्देशनमा डेब्यू गर्ने भएका छन् । यसका लागि उनले ‘दिमाग खराब’ निर्देशक निश्चल बस्नेत तथा अभिनेत्री स्वस्तिमा खड्कासँग सहकार्य गर्दैछन् ।

चैतबाट छायाँकनमा जाने बताइएको सिनेमाका लागि हाल चितवनमा लोकेसन हेर्ने काम भइरहेको छ । सिनेमामा बराल स्वयंको लेखन रहनेछ । यो सिनेमाको लेखन/निर्देशनका लागि बरालले सजन काफ्लेसँग सहकार्य गर्नेछन् ।

सिनेमाको कथा रोमान्टिक ड्रामा हुनेछ । बरालले ‘दिमाग खराब’का अलावा, ‘चपली हाइट-३’, ‘बीए पास’, ‘हल्कारा’लगायत ८ सिनेमा लेखिसकेका छन् ।

यो सिनेमा ब्ल्याक हर्स र मेघौली फिल्मस्को ब्यानरमा निर्माण हुनेछ । सिनेमामा निश्चल र स्वस्तिमाको प्रमुख भूमिका हुनेछ । हाल यी दुई कलाकारमात्र तय भएका छन् भने बाँकी कलाकार तथा प्राविधिक छनोटको चरणमा रहेको निर्माण टीमले जनाएको छ ।

सिनेमाको वर्किङ टाइटल ‘बेहुली फ्रम मेघौली’ राखिएको छ ।