ला लिगामा रियल म्याड्रिड र गिरोनाबीच कडा टक्कर, पछ्याउँदै बार्सिलोना

काठमाडौं। स्पेनिस ला लिगा फुटबलअन्तर्गत बिहीबार राती भएको खेलमा बार्सिलोनाले लास पाल्मासलाई २-१ गोलले हराएको छ ।

विपक्षी टोलीको मैदानमा उत्रिएको बार्सिलोनाका लागि फेरान टोरेस र इल्के गुन्डोगानले गोल गरे। खेलमा सुरुवाती अग्रता भने घरेलु टोलीले लिएको थियो ।

टोरेसले ५५ औँ मिनेटमा गोल गरे । गुन्डोगानले दोस्रो हाफको इन्जुरी समयमा गोल गर्दै बार्सालाई महत्त्वपूर्ण तीन अंक दिलाएका हुन् ।

लास पाल्मासका खेलाडीले रातो कार्ड पाएसँगै बार्सालाई पेनाल्टी प्रहारको अवसर पनि प्राप्त भएको थियो । गुन्डोगानले त्यसैलाई सदुपयोग गरी सम्भावित बराबरी टारे ।

१९ खेलबाट ४१ अंक भएको बार्सिलोना तालिकाको तेस्रो स्थानमा छ ।

शीर्षस्थानमा रहेको रियल म्याड्रिड र दोस्रो स्थानको गिरोना दुवैको १९ खेलबाट समान ४८ अंक छ ।

बुधवार राती भएका खेलमा गिरोना र रियल म्याड्रिड दुवै विजयी भएका थिए ।