मुगुमा १४ वर्षीया बालिकामाथि सामूहिक बलात्कार, जाहेरीपछि नगर प्रहरीसहित ५ जना पक्राउ

सुर्खेत । मुगुको छायाँनाथ रारा नगरपालिका-१४ स्थायी घर भइ गमगढीमा डेरा बस्दै आएकी १४ वर्षीया बालिकामाथि सामूहिक बलात्कार भएको घटना ४ महिनापछि बाहिरिएको छ । पीडितले ९ जनाविरुद्ध जबर्जस्ती करणीको किटानी जाहेरी दिएपछि घटना सार्वजनिक भएको हो ।

बालिकाको जाहेरेपछि केहीलाई पक्राउ गरेर अनुसन्धान अघि बढाइएको जिप्रका मुगुका इन्सपेक्टर भूपेन्द्र बुढाथोकीले नेपाल प्रेसलाई जानकारी दिए । उनका अनुसार नगर प्रहरी र एक कर्मचारीसहित पाँचजना पक्राउ गरिसेको छ । बाँकी चारजना फरार छन् ।

प्रकाउ पर्नेमा छायाँनाथ रारा नगरपालिका-५, कार्की वाडाका ३० वर्षीय नगर प्रहरी वसन्तबहादुर कार्की, कृषि विकास कार्यालय गमगढीमा करारतमा कार्यरत कार्यालय सहयोगी सोरु गाउँपालिका-८ का २२ वर्षीय वसन्त रोकाया र ३ जना नाबालक छन् ।

प्रहरीले कृषि विकास कार्यालयका सवारी चालक पदमबहादुर कठायत र नाबालकको खोजी भइरहेको जनाएको छ । पीडितको जाहेरीमा उल्लेख भएअनुसार उनीहरूले भदौ र असोजमा गरी पटक-पटक बालिकामाथि सामूहिक बलात्कार गरेका हुन् ।

इन्सपेक्टर बुढाथोकीले भने,` जिल्ला अस्पताल मुगुमा चेक गर्दा बालिकाको पेटमा १५ हप्ताको गर्भ रहेको छ । त्यसपछि एक गैरसरकारी संस्थाले जिम्मा लिएर सुर्खेत पठाइएको छ । बालिका बुवाआमासँगै सुर्खेतमा छिन् । थप बुझेकै छैनौं ।’

बालिकाले आफूमाथि भदौ र असोजमा दुईपटक सामूहिक बलात्कार भएको भन्दै छुट्टाछुट्टै किटानी जाहेरी दर्ता गराएकी छिन् । बालिकाले असोज १० गते वसन्तले आफू बस्ने कोठामा आएर एकछिन काम छ भनेर बाहिर आएपछि आफ्नो हात समाएर आफूसँगै हिँड्न लगाएर कृषि विकास कार्यालय भवनको एउटा कोठामा पुर्‍याएर बलात्कार गरेको बयान दिएकी छन् ।

कोठामा पुग्नेबित्तिकै सवारी चालकले कठायतले लोभ र डर देखाउँदै जबर्जस्ती गरेको उनको भनाइ छ । उनीहरूले कसैलाई घटना सुनाए मारिदिने चेतावनी दिएको भन्दै बयान दिएको प्रहरीले बताएको छ ।

पक्राउ परेकाहरूविरुद्ध मुद्दा दर्ता गरी अनुसन्धान अघि बढाइएको छ ।