‘अगस्त्य’मा नाजिरको ५ फरक गेटअप

काठ्माडौं । फागुनको १८ गतेबाट रिलिजमा आउन लागेको चलचित्र ‘अगस्त्यः च्याप्टर १’को फस्टलुकले राम्रै चर्चा बटुिलएको छ ।

नायक सौगात मल्लको दुई फरक गेटअपको पोष्टरले राम्रै चर्चा पाएपछि चलचित्रको निर्माण पक्षले नायक नाजिर हुसेनको लुक्स सार्वजनिक गर्दै नयाँ पोष्टर सार्वजनिक गरेको छ ।

सार्वजनिक पोष्टरमा नाजिरलाई ५ फरक गेटअपमा प्रस्तुत गरिएको छ ।

नाजिरले चलचित्रमा आफूलाई ५ फरक गेटअपमा प्रस्तुत गरेको चलचित्रका लेखक तथा निर्देशक सौरभ चौधरीले जानकारी दिए ।

नाजिरको गेटअप हेर्दा पनि उनले फिल्मका लागि निकै मिहिनेत गरेको देखिन्छ । निर्माण पक्षले दिएको जानकारी अनुसार, नाजिरले यो फिल्मका लागि २० केजी तौल बढाएका थिए । सार्वजनिक पोष्टरमा फिल्मको सुरुवातदेखि अन्तिमसम्मको नाजिरको भूमिकालाई प्रस्तुत गरिएको निर्माण पक्षले जानकारी दिएको छ ।

चलचित्रमा नाजिरलाई ‘निसान’ पात्रको भूमिकामा देख्न सकिन्छ । डार्क हर्स इन्टरटेन्मेन्ट र सेभेन सिज इन्टरटेन्मेन्टको प्रस्तुतिमा तयार भएको चलचित्रमा प्रकाश मल्ल, अनिष तामाङ र बिनोद पौडेलको लगानी छ । चलचित्रका कार्यकारी निर्माता विश्व गौचन र अभिषेक चौधरी हुन् ।

चलचित्रमा सौगात मल्ल, नाजिर हुसेन, मलिका महत, प्रमोद अग्रहरी, विजय बराल, रवीन्द्र झा लगायतका कलाकारको अभिनय छ ।

चलचित्रले बक्स अफिसमा सुखद कमाई गर्नेमा निर्माण टिम बिश्वस्त छन् भने कतिपय फिल्मीकर्मीले ‘अगस्त्य’ नेपाली फिल्मका लागि ट्रेन्ड सेटर बन्ने विश्लेषण समेत गरिरहेका छन् ।