आमिर खानले छोरीको विवाहमा जब दोस्रो पूर्वपत्नीलाई किस गरे…

काठमाडौं । बलिउड अभिनेता आमिर खानले हालै आफ्नी छोरी इरा खानको कन्यादान गरे । इराले आफ्नो लामो समयदेखिका प्रेमी नुपुर सिखरेसँग लगनगाँठो कसेकी हुन् । वैवाहिक समारोह तीन दिनसम्म चलेको थियो ।

यो विवाहलाई लिएर भारतीय मिडियामा थुप्रै समाचार र गसिप बने । अझै पनि बनिरहेका छन् । विवाहमा केही रोचक दृष्य देखिएका थिए । जसमध्ये एउटा भिडियो सामाजिक सञ्जालमा निकै भाइरल बनेको छ । भिडियोमा आमिर खानले आफ्नै दोस्रो पूर्वपत्नी किरण रावलाई गालामा किस गरिरहेको देखिन्छन् ।

आमिरले दुई विवाह गरेका थिए र दुवै असफल भए । उनको पहिलो विवाह रिना दत्तसँग सन् १९८६ मा भएको थियो । रिनाले आमिर अभिनित सुपरहिट फिल्म ‘कयामत से कयामत तक’ मा सानो भूमिका निभाएकी थिइन् । पछि उनले आमिरको फिल्म ‘लगान’ को निर्माताका रुपमा काम गरिन् । तर, सन् २००२ मा यो जोडी अलग भयो ।

आमिर र रिनाबाट सन् १९९३ मा छोरा जुनैद र १९९७ मा छोरी इराको जन्म भएको थियो । विवाहपछि दुवै सन्तानको जिम्मेवारी रिनाले लिइन् । आमिर फुक्का भए । रिनासँग डिभोर्स गरेको तीन वर्षपछि आमिरले दोस्रो विवाह किरण रावसँग गरे । किरणले फिल्म ‘लगान’ मा सहायक निर्देशकको भूमिका निभाएकी थिइन् । उनी हिन्दू हुन् । किरणसँग विवाहपछि आमिरले माछामासु खान छोडेको घोषणा गरेका थिए ।

आमिर र किरणबाट एक छोराका रुपमा आजाद राव खान छन् । उनीहरुले सरोगेसी प्रक्रियाबाट सन् २०११ मा आजादलाई जन्म दिएका हुन् । आमिर र किरणले संयुक्तरूपमा आजादलाई ‘को–प्यारेन्टिङ’ गरिरहेका छन् ।

आमिरका जेठी श्रीमतीतर्फका दुवै छोराछोरी तन्नेरी भइसकेका छन् । छोरीभन्दा छोरा ५ वर्ष जेठा हुन् । छोरा र छोरी दुवैले खासै बलियो प्रोफाइल बनाउन सकेका छैनन् । छोरा जुनैद ३१ वर्षको उमेरमा बल्ल फिल्म डेब्यू गर्दैछन् । उनीसँग एउटा प्राइभेट कार पनि नभएको खुलासा केही समयअघि बुवा आमिरले गरेका थिए । अहिले पनि जुनैद बस र ट्रेनमा यात्रा गर्ने गर्छन् । यो उनको सोख हो ।

छोरी इरा भने मानसिक स्वास्थ्य सम्वन्धी एउटा संस्था सञ्चालन गर्छिन् । उनका पति निखिल फिटनेस ट्रेनर हुन् । इरानले निखिलसँगै ट्रेनिङ गर्ने क्रममा उनीहरु प्रेममा परेका थिए ।

इरा र निखिलको विवाह उदयपूरको फाइभ स्टार होटलमा भएको थियो । सुरुमा विवाह दर्ता भएर त्यसपछि औपचारिक समारोह गरिएको हो । विवाह दर्ताका बेला निखिल आफ्नो जिम ड्रेसमै होटल आएका थिए । उनको गेटअपलाई लिएर निकै ट्रोलसमेत भएको थियो ।

इराको विवाहमा आमिरका दुई पूर्वपत्नी आमनेसामने भए । आमिर र रिना ‘कपल’ कै रुपमा प्रस्तुत भएर इराको कन्यादान गरेका थिए । दोस्रो पूर्वपत्नी किरण पनि आफ्नो छोरा लिएर विवाहमा आएकी थिइन् । विवाहको फोटोसुटमा दुवै पूर्वपत्नी र छोराछोरीलाई आमिरले सँगै राखे ।

दुलाहा र दुलाहीसँग फोटो खिचाउने क्रममा आमिरले रिनालाई समातेर एउटा साइडमा थिए । अर्को साइडमा किरणले छोरालाई समातेर बसेकी थिइन् । किरणको अनुहारमा केही उदासी देखिन्थ्यो । त्यही बुझेर होला, आमिर उनको नजिक गए । केही भने, अनि गालामा चुम्बन गरे । पूर्वपतिको चुम्बनपछि किरणको अनुहारमा मुस्कान फर्कियो ।

यो दृष्यलाई लिएर सामाजिक सञ्जालमा विभिन्न टिकाटिप्पणी भइरहेका छन् । धेरैले सम्वन्धविच्छदपश्चात पनि पूर्वपत्नीप्रति देखाएको प्रेम र आत्मियताका लागि आमिरको साह्राहना गरेका छन् । केहीले चाहीँ यसलाई नाटकको संज्ञा दिएका छन् ।