‘द नेशनल डिजाइनर रनवे २०२४’ को प्रथम चरणको अडिसन सम्पन्न, फेब्रुअरी २८ मा फिनाले

काठमाडौं । फेसन डिजाइनर र मोडलहरुको प्रतियोगितात्मक शो ‘द नेशनल डिजाइनर रनवे २०२४’ को चौथो संस्करणको प्रथम चरणको अडिसन सम्पन्न भएको छ ।

‘मोडल सङ्स नेपाल’को आयोजनामा हुन लागेको प्रतियोगिताका लागि शनिबार काठमाडौंको कमलपोखरीस्थित सिटी सेन्टरमा अडिसन गरिएको हो । अडिसनमा २५ जना डिजाइनर र ६० जना मोडलहरु सहभागी थिए ।

अडिसनमा सञ्चारकर्मी सरोज ओझा, पूर्व मोडल एवम् महिला उद्यमी रुवी महतो, डिजाइनर रन वे दोस्रो संस्करणका विजेता विप्लवराज नागर नहर र उपविजेता सरला डङ्गोल निर्णायक थिए । सहभागी डिजाइनरहरुले डिजाइन शो र मोडलहरुले र्‍याम्प वाकसहित अडिसन दिएका थिए ।

मोडल सङ्स नेपालकी प्रबन्ध निर्देशक स्वस्ती दंगालले चौथो संस्करणको ‘द नेशनल डिजाइनर रनवे’को फिनाले आगामी फेब्रुअरी २८ गते सुकुटे बिचमा गरिने बताइन् । उनले प्रतियोगितामा फेशन डिजाइनरहरुले तयार पारेको पहिरनमा मोडलहरु र्‍याम्पमा उत्रिने जानकारी दिइन् । ‘डिजाइन र र्‍याम्प वाकका आधारमा विजेता घोषणा गरिनेछ’, उनले भनिन् ।