स्तन घटाउने सर्जरी गर्दा ब्राजिलियन पप स्टार ड्यानी लीको मृत्यु

ब्राजिल । ब्राजिलकी पप स्टार ड्यानी लीको लिपोसक्सन सर्जरीका क्रममा मृत्यु भएको छ । ड्यानीको आकस्मिक निधनले श्रीमान् मार्सेलो मिरा स्तब्ध बनेका छन् ।

हिट गीत ‘इउ सो दा अमाजोनिया’(आई एम फ्रम अमेजोन)कि चर्चित गायिका ड्यानी लीको २४ जनवरीमा लिपोसक्सनका क्रममा जटिलताका कारण निधन भएको हो ।

ड्यानी लीको लिपोसक्सन १९ जनवरीमा ब्राजिलको पिनहाइसमा भएको थियो । रिपोर्टहरूका अनुसार, ड्यानी लीले ढाड, पेट र स्तन घटाउने लिपोसक्सन गराएकी थिइन् ।

सर्जरीका क्रममा जटिलता देखिए पछि उनलाई तुरुन्तै नजिकैको शहर क्युरिटिबाको अस्पतालमा लगिएको थियो । अस्पतालमै उनले अन्तिम सास लिएकी थिइन् । अचानक मृत्यु भएपछि अनुसन्धान भइरहेको अंग्रेजी सञ्चारमाध्यमहरुले जनाएको छ ।

ड्यानीले शल्यक्रियाका लागि २५००० ब्राजिलियन रियल (६ लाख ७६ हजार ४५० नेपाली रुपैयाँ) तिरेकी थिइन् ।

ड्यानी अमेजन जङ्गलमा अवस्थित ‘अफुआ’ कि हुन् । उनले ५ वर्षको उमेरदेखि नै गाउन सुरु गरेकी थिइन् । आफ्नै गृहनगरमा भएको ट्यालेन्ट शोमा भाग लिएपछि उनी १७ वर्षको उमेरमा ‘मकापा’ सरेकी थिइन् ।

उनको ‘इउ सो डा अमाजोनिया’ २०१४ मा रिलिज भएको थियो भने दुई महिनाअघि मात्रै उनले आफ्नो अन्तिम गीत सार्वजनिक गरेकी थिइन् । उनको अन्तिम गीत ‘गुएरा डे आमोर’ जनवरी १४ मा रिलिज भएको थियो । ड्यानीको सात वर्षीया छोरी पनि छिन् ।

लिपोसक्सन एक प्रकारको शल्यक्रिया हो । यो शल्यक्रिया पेट, तिघ्रा, हिप, हात, घाँटी आदि जस्ता शरीरका विभिन्न भागहरुबाट बोसो हटाउन प्रयोग गरिन्छ । लिपोसक्सनले यस्ता बोसो भएका भागहरूलाई आकार दिने काम गर्दछ । यो प्रक्रियालाई कन्टोरिङ पनि भनिन्छ ।