‘महाजात्रा’को दोस्रो पोस्टर सार्वजनिक

काठमाडौं । आगामी चैत ९ गते प्रदर्शनको तयारीमा रहेको सिनेमा ‘महाजात्रा’को दोस्रो पोस्टर सार्वजनिक गरिएको छ ।

सिनेमाको यसअघि सार्वजनिक पोस्टरमा हरिवंश आचार्यलाई खलपात्रको अवतारमा प्रस्तुत गरिएको थियो । निर्माण टीमले बिहीबार दोस्रो पोस्टर सार्वजनिक गर्दै सिनेमाप्रति कौतूलह पैदा गर्ने प्रयास गरेको छ ।

सिनेमामा खलनायक बनेका आचार्य दोस्रो पोस्टरमा झुम्म दाह्री पालेको स्वरुपमा छन् । सार्वजनिक पोस्टरमा विपीन कार्की, रवीन्द्रसिंह बानियाँ र रवीन्द्र झालाई पनि प्रस्तुत गरिएको छ । निर्माता टीमले सुरुदेखि नै हरिवंशलाई पब्लिसिटीको केन्द्रमा राख्दै आएको छ ।

अघिल्लो पोस्टरमा हरिवंश ह्वीलचेयरमा बसेको क्यारेक्टरमा देखिएका थिए ।

षट्कोण आर्टस्ले निर्माण गरेको सिनेमा जात्रा सिरिजको तेस्रो श्रृंखला हो । पैसा र शक्तिको कथावस्तुमा आधारित सिनेमामा मुख्य पात्रहरु पैसा कमाउन दौडधुप गर्छन् । सिनेमामा पैसा र खुशीको मानवीय स्वभावको चित्रण गर्ने प्रयास निर्देशक प्रदीप भट्टराईले गरेका छन् ।

वरिष्ठ हास्य अभिनेता हरिवंश ‘महापुरुष’ हिट भएपछि षट्कोण आर्ट्ससँग दोस्रो पटक टीमअप भएका हुन् । कार्यकारी निर्माता तथा अभिनेता रवीन्द्रसिंह बानियाँले जात्रा सिरिजको यो तेस्रो भाग अझै रोचक र कौतूहलताले भरिपूर्ण हुने बताउँछन् ।