दाङको सुनचाँदी पसलमा आगलागी

रुपन्देही । दाङको तुलसीपुरस्थित एक सुनचाँदी पसलमा आगलागी भएको छ ।

तुलसीपुर–५ ‘क’ लाइनस्थित वाणिज्य बैंक बसेको तल्लो तलामा रहेको न्यू नेपाल सुनचाँदी पसलमा बेलुका ७ बजेतिर आगलागी भएको थियो ।

उक्त आगो पौने ८ बजेतिर दमकल, स्थानीय बासिन्दा, सुरक्षाकर्मीको प्रयासमा नियन्त्रणमा आएको इलाका प्रहरी कार्यालय तुलसीपुरका प्रहरी निरीक्षक नवचन्द्र मल्लले जानकारी दिए ।

सुनचाँदी पसलमा आगोले सुन, चाँदीलगायतका अधिकांश सामानमा क्षति भएको छ । उक्त सुन पसल व्यवसायी ललित गुप्ताको हो। सोही स्थानमै रहेको भाग्यलक्ष्मी इन्टरप्राइजेजका कपडामा पनि केही क्षति पुगेको छ। आगलागीको कारण भने पत्ता लाग्न सकेको छैन ।