विधान सम्मेलनअघि माओवादीले बोलायो केन्द्रीय र स्थायी कमिटीको बैठक

काठमाडौं । नेकपा माओवादी केन्द्रले केन्द्रीय र स्थायी कमिटी बैठक बोलाएको छ। मस्यौदा विधान २०८० माथि छलफल गर्न बैठक बोलाएको सचिव दिनानाथ शर्माले बताए।

उनका अनुसार शुक्रबार र शनिबार पार्टी मुख्यालय पेरिसडाँडामा स्थायी समिति बैठक बस्नेछ। दुई दिन स्थायी कमिटी बैठकमा छलफपछि आइतबार र सोमबार केन्द्रीय कमिटीको बैठक बस्ने उनले बताए। बैठक राष्ट्रिय सभा गृहमा बस्नेछ।

बैठकमा तीन दिनसम्म चल्ने विधान सम्मेलनबारे छलफल हुने उनले बताए। बैठकमा पार्टीले सञ्चालन गरेको अभियानको मुल्याकंन र समीक्षा गर्ने उनको भनाइ छ।

उनले थपे,‘केन्द्रीय समितिले स्थायी कमिटीबाट आएको सुझाव र अहिलेसम्म तल्लो तहबाट आएको सुझावलाई समेटेर विधानलाई अन्तिम रुपमा दिन्छ। केन्द्रीय कमिटीले अन्तिम रुप दिएपछि विधान सम्मेलन पारित गर्छ।’

माओवादीमा अहिले उपाध्यक्ष पम्फा भुसाल नेतृत्वको मस्यौदा समितिले तयार गरेको मस्यौदा विधानमाथि छलफल भइरहेको छ।