भ्यालेन्टाइन डेलाई लक्षित गरेर ‘अगस्त्य’को ‘मायामा तिम्रै मायामा’ गीत सार्वजनिक (भिडिओ)

काठमाडौँ । फागुन १८ गते रिलिज हुने चलचित्र ‘अगस्त्य च्याप्टर १’को ‘मायामा तिम्रै मायामा’बोलको गीत सार्वजनिक भएको छ । भ्यालेन्टाइन डेको छेको पारेर गीत सार्वजनिक गरिएको हो ।

ओएसआर डिजिटलबाट सार्वजनिक गरिएको गीतमा एसडी योगी र विज्ञानी पराजुलीको स्वर छ । एसडी योगीकै संगीत र मिक्सिङ मास्टरिङ रहेको गीतमा सबिन एकतारेले शब्द भरेका छन् । गीतका निर्माता भने रिकेश गुरुङ हुन् ।

गीतमा चलचित्रका प्रमुख कलाकार सौगात मल्ल, मलिका महत र रवीन्द्र झालगायतको अभिनय छ । सौरभ चौधरीको लेखन तथा निर्देशन रहेको चलचित्रमा सौगात मल्ल, नाजिर हुसेन, निश्चल बस्नेत, मलिका महत, प्रमोद अग्रहरी, बेन बस्नेत, विजय बराल, रविन्द्र झा, शिशिर वाङ्देल, सिम्रन खड्का, प्रकाश दाहाल, प्रदीप ढकाल, गजेन्द्र त्रिपाठी, सचिन चन्द्रलगायतका कलाकारहरुले अभिनय गरेका छन् ।

चलचित्रको टिजर र ट्रेलर सार्वजनिक भईसकेको छ । टिजर र ट्रेलरबाट मिलेको सकारात्मक प्रतिक्रियाबाट निर्माण पक्ष उत्साहित छ भने चलचित्रको सार्वजनिक हुन बाँकी रहेको ट्रेलरमा थप माया र साथ पाउनेमा टिम आशावादी देखिएको छ । चलचित्रको ट्रेलरले दर्शकलाई चलचित्रप्रति अझै उत्सुकता पैदा गराउने निर्देशक चौधरी बताउँछन् ।

‘डार्क हर्स इन्टरटेनमेन्ट’ र ‘सेभेन सिज इन्टरटेनमेन्ट’को प्रस्तुती रहेको चलचित्रमा प्रकाश मल्ल, अनिश तामाङ र विनोद पौडेल निर्माता रहेका छन् । चलचित्रका कार्यकारी निर्माता भने विश्व गौचन र अभिषेक चौधरी हुन् । चलचित्रमा सञ्जय लामाको छायाङ्कन, मनोज श्रेष्ठको भीएफएक्स, कविराज गहतराजको कोरियोग्राफी, सौरभ शर्मा, भास्कर स्वारको पाश्र्व संगीत र सुप्रिम पराजुलीको कलर छ ।

‘अगस्त्य च्याप्टर १’ फागुनको १८ गते नेपालसँगै विश्वभर रिलिज हुनेछ । चलचित्र अमेरिका र बेलायतमा ८ सयदेखि एक हजार शो, क्यानडामा १ सय ५० शो, युरोपका अन्य देशसँगै जापान, कोरिया, हङकङ र थाइल्यान्डमा १ सय ५० शो, अष्ट्रेलिया र न्युजिल्याण्डमा पाँच सय शो र मध्यपूर्वका देशहरुमा ७ सय ५० शोमा रिलिज हुनेछ ।