दीपेन्द्र बेन्चमा रहेको खेलमा गल्फ जायन्टस पराजित

काठमाडौं । आइएल टी–२० क्रिकेट प्रतियोगितामा दीपेन्द्रसिंह ऐरी सम्मिलित गल्फ जायन्टस पहिलो क्वालिफायरमा पराजित भएको छ । गल्फ एमआई एमिरेट्ससँग ४५ रनले पराजित भएको हो ।

एमिरेट्सले दिएको १६४ रनको लक्ष्य पच्छ्याएको गल्फ ११८ रनमा समेटिएको हो । उक्त खेलमा दीपेन्द्र बेन्चमा थिए ।

नेपालमा आजबाट सुरु हुन लागेको आईसीसी विश्वकप लिग-२ अन्तर्गतको सिरिज छोडेर आइएल टी–२० खेल्न पुगेका दीपेन्द्र भएका दुई खेलमै खेल्न पाएका छैनन् ।

गल्फले आज दोस्रो क्वालिफायरमा दुबई क्यापिटलसँग खेल्दैछ । उक्त खेलमा पराजित भएमा दीपेन्द्र नेपाल फर्किनेछन् । विजयी भएमा भने शनिवार हुने फाइनल खेल कुर्नुपर्ने हुन्छ । त्यसो भएमा दीपेन्द्रले नेपालका सुरुवाती दुई खेल गुमाउने छन् ।

उक्त खेलमा भने नेपाली राष्ट्रिय क्रिकेट टोलीका स्टार अलराउन्डर दीपेन्द्रसिंह ऐरी नखेल्ने भएका छन् । प्रतियोगितामा सहभागी हुन गत शुक्रवार युएई पुगेका ऐरी आजको खेलमा टिममा समावेश गरिएको छैन । शनिवार भएको खेलमा पनि दीपेन्द्र बेन्च मै थिए ।