‘र्‍याप ब्याटल नेपाल’ को अडिसनका लागि प्राविधकसहितको टोली सिक्किम प्रस्थान

काठमाडौं । युजिसा इन्टरनेशनलको आयोजना र राज्य मिडिया नेटवर्कको सह–आयोजनामा हुन लागेको रियालिटी शो ‘र्‍याप ब्याटल नेपाल’ को अडिसनका लागि प्राविधकसहितको टोली सिक्किम प्रस्थान गरेको छ । शोको टिम बिहीबार काठमाडौंबाट सिक्किमका लागि प्रस्थान गरेको हो । टोलीलाई राज्य मिडिया नेटवर्कका अध्यक्ष सरोज ओझाले बिदाई गरेका छन् ।

यो शो एपीवान टेलिभिजनमा अप्रिलबाट प्रसारण आउँदैछ । नेपाली साङ्गीतिक फाँटकादेखि बलिउडका संगीतकर्मी शोमा निर्णायक रहने शोका निर्देशक सानु खानले बताएका छन् । इभेन्ट निर्देशक डेभिल सिंह राजपुतले युवासहित सबै किसिमका दर्शकलाई सांगीतिक माहोलमाँझ रम्ने वातावरण शोले दिने बताए ।

शोको अडिसन सिक्किमसहित दार्जिलिङ र सिलिगुढीमा हुँदैछ । दार्जिलिङ र सिलिगुढीको अडिसनपश्चात नेपालको झापा, इटहरी, जनकपुर, चितवन, पोखरा हुदै काठमाडौंमा अडिसन हुनेछ । जस अनुसार फेबु्रअरी १७ मा सिक्किमको रेमन्ती सङ्गीत एकेडेमी, फेबु्रअरी १९ मा दार्जिलिङको होटल युमा, फेबु्रअरी १९ मा सिलिगुढिको कर्मा म्युजिक एकेडेमी, फागुन ११ गते झापा बिर्तामोडस्थित बिटिएम मन्त्र थकाली, फागुन १३ गते इटहरीको होटेल मादेन इन, फागुन १५ गते जनकपुरको होटल राजदरबार नवरंग रिसोर्ट, फागुन १७ गते चितवनको भरतपुरस्थित चितवन गार्डेन रिसोर्ट, फागुन १९ मा पोखरा लेकसाईडस्थित क्लब सिक्स्टिन र २१ एवम् २२ फागुनमा काठमाडौँमा हुँदैछ ।