राष्ट्रियसभाको अध्यक्ष कांग्रेसलाई दिने सहमति भएको छैन, माओवादीकै हुन्छ: जनार्दन शर्मा (भिडिओ)

काठमाडौं । नेकपा माओवादी केन्द्रका उपमहासचिव जनार्दन शर्माले राष्ट्रियसभाको अध्यक्ष माओवादीबाटै हुने दाबी गरेका छन् ।

प्रतिनिधिसभाको बैठकपछि बाहिरिने क्रममा सञ्चारकर्मीहरुसँग कुरा गर्दै उनले सबैभन्दा ठूलो दलको हैसियतले माओवादीले राष्ट्रियसभा अध्यक्ष पाउने जिकिर गरे ।

उनले भने, ‘सबैभन्दा ठूलो दल हाम्रो हो, उसले दाबी नगरेर अरु कसले गर्छ ? व्यक्तिगत रुपमा कांग्रेसलाई दिने भन्ने कुरा कसले कहाँ गर्‍यो, हामीलाई थाहा छैन । संस्थागत रुपमा कुनै सहमति भएको छैन ।’

उनले सत्ता हस्तान्तरणपछि संवैधानिक परिषदमा शून्य हुने भएकाले राष्ट्रियसभाको अध्यक्ष माओवादीकै हुने दाबी गरे ।

यद्यपि गठबन्धनमा राष्ट्रियसभाको अध्यक्षमा कांग्रेसका कृष्णप्रसाद सिटौलालाई बनाउने भन्ने सहमति बनिसकेको कांग्रेसका नेताहरुले दाबी गर्दै आएका छन् । पछिल्लो समय अध्यक्षमा माओवादीले पनि दाबी गरेपछि गठबन्धनमा भागबन्डा पेचिलो बन्दै गएको छ ।