आत्महत्या गर्नहुन्न भन्ने सन्देश बोकेको सुवास केसीको ‘दिनपछि रात’ सार्वजनिक

काठमाडौं । सुवास केसीको स्वरमा ‘दिनपछि रात’ बोलको नयाँ सन्देशमुलक म्युजिक भिडिओ सार्वजनिक भएको छ ।

करिब आठ मिनेट लामो भिडिओ भरि अहिलेका युवाहरुलाई लंक्षित गरेर आत्महत्या गर्न नहुने सन्देश दिन खोजिएको छ । उमेरको जोशमा होस् गुमाउँदा आउने परिणामको अन्तिम विकल्प आत्महत्या होइन भन्ने सन्देश भिडिओले दिन खोजेको छ ।

आत्महत्या समस्याको समाधान नभएको गायक केसी बताउँछन् । भिडिओबारे गायक केसी भन्छन्, ’समस्या आइपर्दा कहिलेकाँही हामी के गर्ने के गर्ने छुट्याउन सक्दैनौ । अनि समस्याको अन्तिम समाधान हामी आत्महत्या हो भन्ने सोच्छौ । यो समस्या विशेषत युवाहरुमा बढी देखिने गर्दछ । उनीहरुलाई यो उमेरमा सही गाइड गर्ने व्यक्तिको खाँचो हुन्छ । त्यसैले अहिलेका युवाहरुलाई प्राथमिकतामा राखेर यो भिडिओ बनाएको हो ।’

‘मर्ने त मरेर जान्छन। तर कति दुख गरेर हुर्काएका ती आमाबुवामा यहाँ के बित्छ त्यो मरेर जानेले सोच्दैनन। हरेक समस्याको समाधान हुन्छ । त्यसैले मर्नुभन्दा बाँचेर समस्यासँग लड्नु ठिक हो भनेर पर्दामार्फत देखाउने खोजेको छु’, उनले जोडे ।

सार्वजनिक गीतको भिडिओमा योगेश सिंह, विशाल गिरी, दिवाकर घिमिरे, किरण शाही ठकुरी, मञ्जु गिरी, आदि लगायतका कलाकारले अभिनय गरेका छन् ।

गीतमा गणेश सुबेदिको शब्द छ। सन्दिप कार्कीको म्युजिक तथा एरेन्ज रहेको गीतमा रुबिन शाहीको मिक्सिङ तथा मास्टरिङ रहेको छ । पृथक रेकर्डसमा रेकर्ड गरिएको गीतमा नगेन्द्र राईको बाँसुरी, रोहित शर्माको असिस्टेन्ट क्यामरा र मिलिन्द शाक्यको साउन्ड छ ।

भिडिओलाई निर्देशक महेश केसीले निर्देशन गरेका छन् । भिडिओको सम्पादन पनि उनी स्वयंले गरेका हुन् ।

भिडिओ सुवास केसीको आफ्नै आधिकारिक युट्उब च्यानल ’इम्पेरिओ एजुकेसन’ मार्फत सार्वजनिक भएको छ । उनी इम्पेरिओ एजुकेसनका संस्थापक हुन् । यो उनको पहिलो सृजना भने होइन । उनले दुई वर्ष अगाडि ’चम चम’ बोलको गीत निकालेका थिए। गीतको भिडिओमा उनी आफैले अभिनय गरेका थिए ।