दार्चुलामा सशस्त्र प्रहरीका सहायक हवलदार मृत फेला

कैलाली । दार्चुलामा सशस्त्र प्रहरीका सहायक हवलदार मृत फेला परेका छन् ।

अपि हिमाल गाउँपालिका- २ मा बैतडीको पुर्चौडी नगरपालिका- ३ का ३० वर्षीय सुरेन्द्रबहादुर बोहरा मृत फेला परेको जिल्ला प्रहरी कार्यालय दार्चुलाका प्रमुख प्रहरी नायब उपरीक्षक शिवबहादुर सिंहले जानकारी दिए ।

प्रहरी नायब उपरीक्षक सिंहका अनुसार बोहरा कञ्चनपुरको सशस्त्र प्रहरी बल बीओपी बह्मदेवमा कार्यरत थिए ।

प्रहरीका अनुसार सोमबार बिहान करिब ९ बजेतिर उनी ससुराली घरको सय मिटर टाढा रूखमा झुन्डिएको अवस्थामा फेला परेका थिए । मृतकका बुवा बैतडीबाट घटनास्थलमा पुगेपछि मात्रै पोस्टमार्टम गरिने प्रहरीले जनाएको छ ।

घटनाबारे थप अनुसन्धान भइरहेको प्रहरीले जनाएको छ ।