‘अगस्त्य’मा कैंची : भोलिबाट २ घन्टा ३० मिनेटको फिल्म हलमा लाग्दै

काठमाडौं । गत शुक्रबारबाट प्रदर्शनमा आएको चलचित्र ‘अगस्त्य–च्याप्टर १’लाई भोलिबाट दर्शकले केही फरक अन्दाजमा हेर्न पाउने भएका छन् ।

२ घण्टा ५० मिनेट लामो चलचित्रलाई निर्माण टिमले घटाएर २ घण्टा ३० मिनेटको बनाएका छन। चलचित्र अझ रोचक बनाउन र केही बढी भएको सिनलाई मर्ज गर्न निर्माण टिमले चलचित्रको लम्बाइ घटाएको हो ।

२० मिनेट लम्बाइ घटाईएको चलचित्रमा केही दृष्यहरु काटेर मिक्स गरिएको छ। चलचित्रको रिलिज डेटबाटै चलचित्र स्लो भएको समीक्षाहरु आएपनि फास्ट स्लोमा भने खासै काम नगरिएको चलचित्रका लेखक तथा निर्देशक सौरभ चौधरी बताउँछन् ।

उनी भन्छन्, ‘चलचित्र स्लो भयो भनेर दर्शकले भन्नु भएको छैन। मिडियाको मान्छे मात्र उफ्रिरहनु भएको छ । जब की रिलिजपूर्व हामी सबैैले चलचित्र हेरेका थियौ। निश्चल बस्नेतले पनि ठिक छ भन्ने कुरा गर्नुभएको थियो । त्यसैले केही दृष्यहरु हेरबदल गरेर २० मिनेट घटाएको हो ।’

‘मैले स्लो–फास्टमा काम गरेर २० मिनेट चलचित्र घटाएको हैन । सिनहरु अगाडी–पछाडी मात्र गरेको छु । बीचमा दुईवटा सिनहरु चलचित्रलाई चाहिन्छ भनेर राखेको थिए । त्यसलाई काटेर मिक्स गरेको छु । लभको केही पोर्सनहरुलाई अगाडी तानेको छु’, उनले थपे ।

‘मैले भोलिबाट हलमा चलचित्रको नयाँ भर्जन हाल्दैछु। चलचित्रलाई घटाएर २ घण्टा ३० मिनेटको बनाएर भोलिबाट दर्शकलाई देखाउँदैछु’,उनले जोडे ।

गत शुक्रबारबाट रिलिजमा आएको चलचित्र ‘अगस्त्य’ मा सौगात मल्ल, नाजिर हुसेन, मलिका महत, निश्चल बस्नेत, प्रमोद अग्रहरी, बेन बस्नेत, बिजय बराल, आदि लगायतका कलाकारको अभिनय रहेको छ ।