एलिनाको कार्यक्रममा साउन्ड सिस्टम उपलब्ध नगराउने पाँच व्यवसायीको चेतावनी, माफी माग्नुपर्ने माग

पोखरा । गायिका एलिना चौहानको एक साउन्ड टेक्निसियनसँग भनाभन भएको घटना थप गहिरिएको छ । ५ वटा साउन्ड सिस्टम कम्पनीले एलिनाले माफी माग्नुपर्ने भन्दै उनका कार्यक्रममा साउन्ड सिस्टम उपलब्ध नगराउने चेतावनी दिएका छन्।

गत फागुन २० गते कुस्मामा आयोजित एक महोत्सवमा साउन्ड सिस्टम खराब भएपछि एलिनाले टेक्निसियनसँग गुनासो गरेकी थिइन् । तर टेक्निसियनले उल्टै एलिनालाई ‘पहिले तपाईँको आवाज सफा गर्नुस्’ भन्दै अपमानित तुल्याएका थिए । एलिनाले पनि जवाफ फर्काएपछि भनाभन भएको थियो । एलिना आफ्नो प्रस्तुति नसकीकन बाहिरिएकी थिइन् ।

यो घटनाको पाँच दिनपछि पाँच साउन्ड सिस्टम व्यवसायीले विज्ञप्ति जारी गर्दै एलिनामाथि नै दोषारोपण गरेका हुन् । एलिनाले टेक्निसियनलाई अमर्यादित व्यवहार गरेको उनीहरूको आरोप छ ।

‘…हामी कलाकारलाई राष्ट्रको गहनाका रूपमा इज्जत गर्नुपर्छ भन्ने मान्यतामा विश्वस्त छौँ । तर साउण्ड सिस्टम र स्पिकरलाई दोष दिई साउण्ड इन्जिनियरलाई गालीगलौज गर्नेजस्ता अभद्र व्यवहार गायिका एलिना चौहानले गरेको हुँदा हामी सम्पूर्ण साउण्ड कम्पनी, इन्जिनियर र टेक्निसियनहरू निन्दनीय व्यवहारको घोर भर्त्सना एवम् विरोध गर्छौँ,’ विज्ञप्तिमा भनिएको छ ।

एलिनाले कुस्मामा सञ्चालित कार्यक्रममा मात्रै होइन यसअघि पनि मञ्चमा थुप्रैपटक साउण्ड सिस्टमलाई सराप्ने र टेक्निसियनलाई गाली बेइज्जती गर्ने गरेको आरोप विज्ञप्तिमा लगाइएको छ ।

एलिना जुन कार्यक्रममा गए पनि ‘साउण्ड मिलेन’ भन्ने बानी नै परिसकेको र आफू चर्चित गायिका बनिसकेको आत्मरति र घमण्डले एलिनालाई नोक्सानी नहोस् भन्नेतर्फ पनि सचेत रहेको विज्ञप्तिमा उल्लेख छ । आफ्नो प्रस्तुति र स्वर फितलो भएपछि आयोजकले तय गरेको साउन्ड सिस्टममा खोट लगाइएको दाबी समेत गरिएको छ ।

‘चौहानले आफ्नो गल्तीको महसुस गरी माफी नमागेसम्म साउण्ड सिस्टम कम्पनी सञ्चालक, साउण्ड इन्जिनियर, टेक्निसियनहरूले एलिना चौहान उपस्थित भएको कुनै पनि कार्यक्रम र ठाउँमा आगामी दिनमा साउण्ड सिस्टम उपलब्ध नगराउने घोषणाको गर्दछौं,’ विज्ञप्तिमा भनिएको छ ।

यो प्रकरणमा ऐक्यबद्धताका लागि देशभरका साउन्ड सिस्टम कम्पनीलाई आग्रहसमेत गरिएको छ ।

विज्ञप्ति जारी गर्नेमा जिके साउण्ड सिस्टम, एसके साउण्ड लाइट एण्ड म्युजिक स्टोर्स, साउण्ड गार्डेन, मञ्जित साउण्ड सिस्टम, जोजिजू म्युजिक एण्ड साउण्ड सिस्टम सर्भिस र एविज साउण्ड सिस्टम रहेका छन् ।