निर्वाचन आयोगको निर्णयविरुद्ध रेशम चौधरी अदालत जाने(भिडिओ)

रुपन्देही । निर्वाचन आयोगले पार्टीको महाधिवेशनले गरेको निर्णय विपरीत निर्णय गरेको भन्दै नागरिक उन्मुक्ति पार्टीका अध्यक्ष रेशम चौधरीले निर्वाचनको आयोगको गरेको निर्णयको विषयमा आफू अदालत जानसक्ने बताएका छन् ।

शनिबार बुटवलमा आयोजित पत्रकार सम्मेलनमा चौधरीले आन्तरिक विधानका एकदुईवटा बुँदालाई हेरेर अस्वीकार गर्नु अन्याय भएको उनले बताए ।

‘निर्वाचन आयोगको पत्र अझैसम्म बुझेको छैन, आइतबार १० बजेपछि पत्र बुझेर नयाँ ढङ्गबाट जाने हो, अहिलेसम्म पत्र स्पष्टसँग अध्ययन नभएकोले पत्र बुझेपछि राजनीतिक या कानुनी उपचार खोज्ने निर्णयमा पुग्ने हो’ उनले भने–‘त्यति ठूलो महाधिवेशनले गरेको निर्णयविरुद्ध भएको खेल कहाबाट भएको छ ? आन्तरिक बुँदामा भएका केही कमजोरीलाई हेरेर गरिएको यो निर्णयले घोर अन्याय भएको छ ।’

देशका निकै थोरै पार्टीको मात्र महाअधिवेशन हुने र त्यसमा नागरिक उन्मुक्ति पार्टी एक भएको बताउँदै उनले महाअधिवेशन पार्टीको सर्वोच्च निकाय भएको र त्यसले गरेको निर्णयमा निर्वाचन आयोगले बाधा पुर्‍याएकाले उचित उपचार खोजिने बताए ।