विनय र सौरभले ल्याए नयाँ र्याप– भेटेर कुरा गरौँन, म रुम मिलाउँछु…

काठमाडौं । अहिले सामाजिक सञ्जालमा चर्कोरुपले भाइरल भइरहेको संवाद ‘म रुम मिलाउँछु।।’ माथि गीतसमेत बनेको छ । र्यापरद्वय विनय कार्की क्षेत्री र सौरभ ढकालले यो र्याप गाएका हुन् ।

गीतको लिरिक्स ‘हामी भेटेर कुरा गरौं न है म रुम मिलाउँछु’ बाट सुरु भएको छ । त्यसपछिका शब्दहरु भने अरु नै छन् । दुई दिनअघि रिलिज गरिएको र्यापलाई अहिलेसम्म ७२ हजारपटक हेरिसकिएको छ भने झण्डै दुई सयले प्रतिक्रिया जनाएका छन् । प्रतिक्रियाहरु मिश्रित छन् ।

भिडिओको लिरिक्स ‘भाइरल वर्ड’ भनिएको छ । र्यापको लिरिक्स भने सौरभले लेखेका हुन् । भिडिओको निर्देशन शिशिर अर्यालले गरेका छन् ।कार्कीले कसैको भावनालाई ठेस पुर्याउन नखोजेको प्रष्टीकरणसमेत दिएका छन् ।

उनले युट्यूवमै लेखेका छन्, ‘कसैको भावनालाई लक्ष्यित गर्ने सोचले यो गीत बनाएका होइनौं । संगीतको ‘जामिङ प्राक्टिस’ गर्ने क्रममा प्रतिभाशाली भाइ सौरभ ढकाल र मेरो सहकार्यमा अचानक बन्न गएको हो । त्यो शब्दबाहेक हरेका शब्दहरुको अर्थ फरक छ । धेरै जनाको सल्लाहमा यो गीतलाई सामान्यरुपमा रिलिज गरेका छौं र असर पर्न गएमा माफी चाहन्छौं ।’

इन्द्रेणीबाट निकालिएकी कलाकार शर्मिला श्रेष्ठले धरधरी रुँदै एउटा पत्रकार सम्मेलनमा प्रस्तुत भएकी थिइन् । आफूलाई इन्द्रेणीका सञ्चालक कृष्ण कँडेलले ‘ह्यारेसमेन्ट’ गरेको भन्दै उनले कँडेलले पठाएका केही म्यासेज रुँदै पढेर सुनाएकी थिइन् । उनले सुनाएको म्यासेजको एउटा अंश थियो ‘हामी एक दिन भेटेर कुरा गरौंन है म रुम मिलाउँछु ।’

तर, शर्मिलाले यसरी पिडा ओकल्दा मानिसहरुले मजाक बनाए । उनको यो संवादमाथि हजारौं रिल र टिकटक भिडिओ बनेका छन् । यतिसम्म कि विदेशी नागरिकले समेत भिडियो बनाएको पाइएको छ । आफूमाथि चर्को ट्रोल भएपछि शर्मिलाले कँडेलमाथि हालेको यौन दुव्र्यवहारको मुद्दा समेत फिर्ता लिन वाध्य भइन् ।