विश्वकप फुटबल छनौटको बहराइनविरुद्ध हुने खेलका लागि नेपाली टोलीको घोषणा (भिडिओ)

काठमाडौं । विश्वकप फुटबलको एसियाली छनोटअन्तर्गत दोस्रो चरणको प्रतिस्पर्धामा बहराइनविरुद्ध हुने खेलका लागि नेपाली राष्ट्रिय टोलीको घोषणा गरिएको छ ।

अखिल नेपाल फुटबल संघ-एन्फाले मंगलबार २३ सदस्यीय राष्ट्रिय टोलीको घोषणा गरेको हो । नेपालले बहराइनसँग मार्च २१ र २६ तारिखमा खेल्दै छ । त्यसअघि मलेसियामा घरेलु टोलीसँग मार्च १५ तारिखमा प्रतिस्पर्धा गर्ने छ ।

नेपाली टोलीको गोलकिपरतर्फ किरणकुमार लिम्बु, अभिशेष बराल र विशाल सुनार छन्। डिफेन्डरमा अभिशेक लिम्बु, अजय चौधरी, अनन्त तामाङ, छिरिङ लामा, सनिष श्रेष्ठ, सौभाग्य राई र सुमित श्रेष्ठ छन् ।

मिडफिल्डका लागि भरत खवास, विशाल बस्नेत, लाकेन लिम्बु, मनिकुमार लामा, मनिष डाँगी, रोहन कार्की र उत्सव राईलाई टोलीमा समावेश गरिएको छ । अन्जन विष्ट, दिनेश हेन्जन, हिसहुब थपलिया, समिर तामाङ, सन्जिव विष्ट र जेलेस्पीजङ कार्कीले अग्रपंक्ति सम्हाल्नेछन् ।

एन्फाले मंगलबार साँझ टोलीको बिदाइ गरेको छ ।