लुम्बिनीमा ५ हजार जना सहभागी एकहप्ते विराट चक्रविज्ञानको तयारी

रुपन्देही । बुद्ध जन्मस्थल लुम्बिनीमा एकैपटक एक सातासम्म ५ हजार जनाको सहभागितामा विराट चक्रविज्ञान आयोजना गरेर विश्व रेकर्ड कायम गर्न बनाउन आयोजकहरु लागेका छन् ।

हालसम्म अष्ट्रेलियामा १४७१ जना सहभागी बनाएर यस्तो कार्यक्रम गरिएकोले यो कार्यक्रमबाट विश्व रेकर्ड कायम गरिने दावी आयोजकको छ ।लुम्बिनीस्थित अन्तर्राष्ट्रिय ध्यानकक्षमा विभिन्न १५ मुलुकका नागरिक र नेपालका सबै जिल्लाबाट आउने सहभागितामा ७ दिनसम्म विभिन्न ५ वटा ऊर्जा ध्यानसहितको प्रयोगात्मक कक्षा सञ्चालन हुने भएको हो ।

जीव विज्ञान परिषद्को आयोजनामा यही चैत्र १७ गतेदेखि २३ गतेसम्म हुने विराट चक्र विज्ञानको लागि तयारीलाई तीब्र पारिएको लुम्बिनी संयोजक केशव खनालले बताए ।

विश्वमै पहिलो पटक यति ठूलो संख्यामा ध्यानको कार्यक्रम आयोजना गर्न लागिएको बताउँदै संयोजक खनालले यस कार्यक्रमलाई गिनिज बुक अफ वर्ल्ड रेकर्डमा समेत दर्ता गरिने उल्लेख गरे । यस प्रकारको कार्यक्रम यसअघि अस्ट्रेलियमा आयोजना हुँदा १४७१ जना उपस्थित भई ३ दिनसम्म मात्रै आयोजना भएको उल्लेख गर्दै उनले यो नै पहिलो र ठूलो कार्यक्रम हुने दाबी गरे । कार्यक्रममा देशका विभिन्न सरकारी निकायका प्रतिनिधि तथा अनुयायीहरुलाई निमन्त्रणा गरिएको उनले जानकारी दिए ।

भगवान गौतम बुद्धको ‘अप्प दिपो भव’ अर्थात तिमी आफ्नो प्रकाश आफै बन भन्ने स्व–जागरणको उपदेशलाई सार्थक बनाउन कार्यक्रम आयोजना गरिएको उनले बताए ।

व्यक्ति भित्र नैशर्गिाक रुपमा रहेका स्वास्थ्य सुख, आत्मविश्वास, प्रेम, ज्ञान, संकल्प र आनन्दको अद्भुत क्षमता तथा सम्भावनालाई उजागर गरी सुखी, शान्त र समृद्ध राष्ट्रको आधार तयार पार्न यसले सहयोग गर्ने दाबी गरे । कार्यक्रमबाट विश्व सान्तीका अग्रदूत भगवान गौतमबुद्धको जन्मस्थल र उनले दिएका ध्यानको शिक्षालाई सामूहिक रुपमा विश्वमाझ फैल्याएर नेपाललाई एक उत्कृष्ट आध्यात्मिक पर्यटकीय गन्तव्यस्थल बनाउन सहयोग पुग्ने दाबी गरिएको छ ।

कार्यक्रमबारे जानकारी गराउन आइतबार बुटवलमा आयोजित पत्रकार सम्मेलनमा बोल्दै परिषदका सूचना तथा सञ्चार विभाग परिषद अध्यक्ष दुर्गाबहादुर क्षेत्रीले आफ्नो क्षमताको बिकास गर्न चाहने उद्योगी, व्यवसायी, व्यापारी, निजी क्षेत्रका कर्मचारी, साष्ट्रसेवक कर्मचारी, सुरक्षाकर्मी, समाजसेवी तथा राजनीतिक कर्मी लगायत समग्रह क्षेत्रका व्यक्तिहरुलाई आमन्त्रण गरिएको बताए ।

लुम्बिनीमा आयोजना गरिएको यस कार्यक्रमले यस क्षेत्रको पर्यटन बिकास तथा आर्थिक बिकासमा समेत टेवा पुग्ने आयोजकले बताएको छ । विराट चक्रविज्ञानमा सहभागी हुने व्यक्तिको आवासका लागि लुम्बिनी, भैरहवा तथा बुटवलसम्मका होटल तथा गेष्टहाउसहरुमा व्यवस्था मिलाइने बताइएको छ । यसैगरी लुम्बिनीदेखि बुटवल तथा भैरहवासम्म आउनका लागि अयाजकले नै निःशुल्क आयायातको व्यवस्था गरिएको छ ।

कार्यक्रममा सहभागी हुनका लागि रेजिष्ट्रेशनको काम जारी रहेको बताउँदै उनले व्यवस्थापन खर्च स्वरुप उनीहरुबाट प्रतिव्यक्ति १० हजार शुल्न उठाइएको जानकारी गराए । उक्त शुल्कबाट एक सातामा सम्म ज्ञानमा सहभागीहरुलाई भोजन तथा हलमा कार्पेटिङ, साउण्ड तथा डिजिटल डिसप्ले लगायतको व्यवस्थापनमा खर्च गरिने उल्लेख गरे ।

परिषदका शिक्षा बिकास संयोजक हरि पोखरेलका अनुसार ज्ञानमा सहभागीहरुलाई दैनिक ३ छाक भोजनको व्यवस्था आयोजकले गर्ने भए पनि आवासका लागि सहभागी स्वयम्ले नै व्यवस्था गर्नुपर्ने छ ।