हावाहुरीले रुख ढल्दा सडकमा गुडिरहेको स्कुटरमा च्यापिएर मृत्यु

रुपन्देही । हावाहुरीले रुख ढल्दा पाल्पामा सडकमा गुडिरहेको स्कुटरमा सवार एक युवकको मृत्यु भएको छ ।

डुम्रे नजिकै जरेपिपलमा बाटोमा सल्लाको रुख ढलेर लाग्दा स्कुटर चालक पाल्पा कैलाशनगरका २० बर्षीय भुवन सिंजालीको घटनास्थलमै ज्यान गएको प्रत्यक्षदर्शीले बताएका छन् ।

सल्लाको रुख पल्टेर च्याप्दा सिंजालीको घटनास्थलमै ज्यान गएको हो । लु ८१प ११३६ नम्बरको स्कुटर चालक भुवन पाल्पाबाट बुटवलतर्फ आउँदै थिए । हावाहुरीकै कारण सोही स्थानमै रोकिराखेको ग १०प ५७२१ नम्बरको स्कुटर र एकमोटरसाइकल पनि पल्टिएको छ ।

पानीसहित आएको हावाहुरीले रुख पल्टाएका कारण पाल्पा–बुटवल सिद्धार्थ राजमार्ग राती अबेरसम्म अवरुद्ध भएको छ । स्कुटरमा सवार अर्का एक जना सामान्य घाइते भएको पाल्पा प्रहरीले जनाएको छ । शनिबार साँझपख आएको हावाहुरीले पाल्पाका धेरै ठाउँमा क्षति पुराएको छ ।