ओली र प्रचण्डसँग बार्गेनिङ बढाउँदै माधव नेपाल, प्रदेश सरकारबारे राखे यस्ता शर्त

काठमाडौं । नेकपा एकीकृत समाजवादीले सात मध्ये कम्तीमा एक प्रदेशको मुख्यमन्त्री, संघीय सरकारमा थप एक मन्त्री र सबै राजनीतिक नियुक्तिमा सम्मानजनक सहभागिताको लिखित ग्यारेन्टी मागेपछि प्रदेश सरकार गठन तथा विश्वासको मत लिने प्रक्रियामा अन्योल सिर्जना भएको छ ।

प्रधानमन्त्री निवास बालुवाटारमा आइतबार बसेको सत्ता साझेदार दलहरूको बैठकमा नेकपा एसका अध्यक्ष माधवकुमार नेपालले बागमती वा कोशीको सरकारको नेतृत्व आफ्नो पार्टीले पाउनुपर्ने शर्त राखेका छन् । कोशीमा नेकपा एसको ४ सीट छ भने बागमतीमा ८ सीट छ ।

माधव नेपालले संवैधानिक परिषद्ले गर्ने नियुक्तिमा समेत नेकपा एसको हिस्सा हुनुपर्ने बताएका छन् । त्यस्तै नेपालले प्रधानमन्त्री आलोपालो पनि मौखिक सहमतिमा विश्वास गर्न सकेका छैनन् ।

नेपालले यथास्थितिमा प्रदेश सरकार गठन तथा विश्वासको मत लिने दिने प्रक्रियामा नेकपा एस एमाले र माओवादीसँग नरहने बताएका छन् । बागमतीका मुख्यमन्त्री शालिकराम जमरकट्टेलले सोमवार विश्वासको मत लिने तयारी छ । तर नेकपा एसले यथास्थितिमा विश्वासको मत दिन नसकिने जनाएको छ ।

एक प्रदेशको मुख्यमन्त्री, संवैधानिक तथा राजनीतिक नियुक्तिमा हिस्सेदारी,विगतमा नेकपा एसलाई बाइपास गरेर सत्ता परिवर्तन गरेकोमा आत्मालोचना गर्नुपर्ने लगायतका माग नेकपा एसले राखेको छ ।