यथास्थितिमा विश्वासको मत नदिने नेकपा एसको अडानले जम्कट्टेल सरकार धरमरमा

हेटौंडा । बागमती प्रदेशका मुख्यमन्त्री शालिकराम जम्कट्टेललाई विश्वासको मत दिने या नदिने विषयमा नेकपा एकीकृत समाजवादीले अहिलेसम्म निर्णय लिएको छैन ।

गत फागुन २३ गते नेपाली कांग्रेसले आफ्ना मन्त्रीलाई फिर्ता बोलाएर सरकारलाई दिएको समर्थन फिर्ता लिएपछि आज मुख्यमन्त्री जम्कट्टेलले विश्वासको मत लिँदैछन् । दिउँसो १ बजे प्रदेशसभा बैठक बोलाइएको छ । तर, गठबन्धनमा रहेको नेकपा एसले मुख्यमन्त्रीमा आलोपालोसहित अन्य भागबण्डाको विषयमा लिखित प्रतिवद्धता खोजेपछि जम्कट्टेललाई सकस परेको हो ।

नेपाल प्रेससँग कुरा गर्दै नेकपा एसका नेता तथा बागमतीका श्रम, रोजगार तथा यातायातमन्त्री लक्ष्मण लम्सालले केन्द्रको स्पष्ट निर्देशनविना विश्वासको मत दिन नसकिने बताए । केन्द्रीय कमिटीको बैठक र संसदीय दलको निर्णयअनुसार आफूहरू अगाडि बढ्ने उनको भनाइ छ ।

जम्कट्टेलाई आफ्नो नेतृत्वको सरकार जोगाउन नेकपा एसको समर्थन चाहिन्छ । नेकपा माओवादी केन्द्र बागमतीका मुख्य सचेतक रत्न ढकालले आफूहरु पनि केन्द्रको निर्देशन कुरिरहेको बताए ।

११० सदस्यीय बागमती प्रदेशमा जम्कट्टेललाई बहुमतका लागि ५६ सांसद चाहिन्छ । उनले केही दिनअघिमात्र हाम्रो नेपाली पार्टी (हानेपा) का संसदीय दलका नेता शैलेन्द्रमान बज्राचार्यलाई मन्त्री बनाएर विश्वासको मत लिने वातावरण बनाएका थिए । एमाले-माओवादी-नेकपा एससँग जम्मा ५५ सांसद छन् ।