ओलीले दाबी गरेझैँ उपनिर्वाचनमा माओवादीले एमालेलाई समर्थन गर्छ ?

काठमाडौं । वैशाख १५ गते हुने उपनिर्वाचनमा सत्ता गठबन्धनमा आबद्ध दलहरू एक्ला एक्लै भिड्ने तयारी गरिरहेका छन्।

एमाले, माओवादी, रास्वपा र नेकपा एकीकृत समाजवादीले उम्मेदवार नै घोषणा गरेर आन्तरिक तयारी थालिसकेका छन्। तर, गठबन्धनमा आबद्ध जसपालाई भने अहिलेसम्म उपनिर्वाचनले छोएको छैन।

सत्ता गठबन्धनमा साझा उम्मेदवार बनाएर जाने विषयमा छलफल भए पनि कुरा नमिल्दा दलहरूले आ–आफ्नो उम्मेदवार खडा गरेका छन्। गठबन्धनमा आबद्ध भए पनि रवि लामिछाने नेतृत्वको रास्वपाले सुरुमै आफूहरू चुनावी गठबन्धनको पक्षमा नरहेको प्रष्ट्याएको थियो।

तर, माओवादी र नेकपा एसले गठबन्धनभित्र दबाब बढाउने रणनीतिका साथ उम्मेदवारी घोषणा गरेको बताइन्छ। यही बीचमा एमाले अध्यक्ष केपी ओलीले उपनिर्वाचनमा आफूहरूलाई माओवादीले सहयोग गर्ने विश्वास व्यक्ति गरे।

शनिवार एक कार्यक्रममा उनले भनेका थिए, ‘उपनिर्वाचनमा मलाई विश्वास छ, अन्तिम समयसम्म माओवादीले हामीलाई समर्थन गर्छ। हाम्रो ठाउँमा माओवादी भएको भए खुला दिलले समर्थन गर्थ्यौँ। गणितले स्पष्ट भएकाले हामीले छोड्न मिल्दैन। माओवादी र समाजवादीले साथ दियो भने हामी धेरै मतान्तरले जित्छौँ तर, उहाँहरूले जित्ने अवस्था छैन।’

ओलीले माओवादीले एमालेलाई अन्तिम सम्ममा समर्थन गर्ने बताए पनि त्यस विषयमा छलफल नभएको माओवादीका महासचिव देव गुरुङले बताए।

उनले भने, ‘अहिलेसम्म हामीले नै उम्मेदवारी दिएर जाने भन्ने निर्णय गरेको छौँ। त्यहाँबाट थप निर्णय भएको छैन। पार्टीमा छलफल हुनसक्छ।’

उम्मेदवारी मनोनयन २४ गते हुँदै छ। त्यस बेलासम्म गठबन्धनको साझा उम्मेदवार बनाएर जानेबारे छलफल हुनसक्ने सचिव दिनानाथ शर्माले बताए।

उनले गत बुधवार नेपाल प्रेससँग भनेका थिए, ‘अहिले हामीले उम्मेदवारी दिएर जाने भनेर निर्णय गरेका छौँ। अब गठबन्धन दलहरूबीच साझा उम्मेदवार बनाएर जाने विषयमा छलफल हुनसक्छ।’

गठबन्धनमा छलफलपछि सहमति बने उम्मेदवारी दिने पार्टीले गरेको निर्णय फेरिन सक्ने उनको भनाइ थियो। त्यसो त इलाममा एमालेले उम्मेदवार बनाएका सुहाङ नेम्वाङलाई ओलीले बालुवाटार पुर्‍याएर प्रचण्ड र माधव नेपालसँग भेटाएर इलाम पठाएका थिए। त्यसैले अन्तिमसम्म पार्टीको निर्णय फेरिन सक्ने माओवादीका एक पदाधिकारीले बताए।

ती नेताले भने, ‘इलाम एमालेको विरासत भएको ठाउँ हो। हाम्रो जनमत पनि छैन। त्यसैले उपनिर्वाचनमा एमालेलाई सहयोग गरेर सहकार्यलाई थप विश्वास र पछि सम्मको लागि हेर्दा निर्णय फेरिन सक्छ।’

एमालेले इलाम २ मा सुवास नेम्वाङका छोरा सुहाङलाई उम्मेदवार बनाउँदा बझाङमा दमनबहादुर भण्डारीलाई उम्मेदवार बनाएको छ।

इलाम २ का लागि ४ जनाको नाम सिफारिस भएकोमा प्रदेश कमिटीले धिरेन शर्मा रमणको मात्रै नाम मात्रै केन्द्रमा सिफारिस गरेको छ भने बझाङमा सुदूरपश्चिम प्रदेश कमिटी सचिव जनक बुढालाई उम्मेदवार बनाउने निर्णय गरेको छ।

नेकपा एसले इलाम २ मा जीतबहादुर राई र बझाङको प्रदेशसभातर्फ दिलबहादुर सिंहलाई उम्मेदवार बनाएको छ। इलाम २ र बझाङ दुवै माओवादी र नेकपा एसको जनआधार भएको क्षेत्र होइन।