चिनियाँ अनुवादक संघबाट उत्कृष्ट विदेशी अनुवादन विज्ञको रूपमा नेपालका आचार्य पुरस्कृत

काठमाडौं । चीनका अनुवादकहरूको संस्था चिनियाँ अनुवादक संघबाट नेपाली लेखक, सञ्चारकर्मी तथा अनुवादक चेतनाथ आचार्य पुरस्कृत भएका छन् ।

चीनको हुनान प्रान्तको राजधानी छाङ्सामा आचार्य यही मार्च ३० मा पुरस्कृत भएका हुन् । आचार्यलाई उत्कृष्ट विदेशी अनुवादन विज्ञको रूपमा पुरस्कृत गरिएको हो ।

पुरस्कृत गरिएको प्रमाणपत्रमा आयोजकले आचार्यलाई ‘चीन र विश्वको अनुवादन तथा सांस्कृतिक आदानप्रदानमा महत्त्वपूर्ण भूमिका खेलेको’ भन्दै प्रशंसा गरेको छ ।

डेढ दशक चीन बसेर चिनियाँ अन्तर्राष्ट्रिय रेडियो सिआरआईमा आबद्ध आचार्यले चीनमै बसेर आधा दर्जन किताब ल्याएका छन् ।

उनले चीन र नेपाल जोड्ने आख्यान ‘रुइबा’को लागि गैर आवासीय नेपालीहरूले प्रदान गर्ने पुरस्कार अरनिको अन्तर्राष्ट्रिय पुरस्कार पाएका छन् ।

पुरस्कार पाएपछि आचार्यले सामाजिक सञ्जालमा प्रसन्नता प्रकट गरेका छन् ।

उनले लेखेका छन्, ‘यो पुरस्कारले मलाई अझैबढी हौसला, जोस र जाँगर थपेको छ । मेरो कामको मूल्याङ्कन गर्ने विशिष्ट चिनियाँ विद्वान, काम गर्ने वातावरण मिलाउने समग्र पक्ष र मलाई प्रत्यक्ष अथवा परोक्ष रूपमा सहयोग गर्ने सबैप्रति हार्दिक आभार व्यक्त गर्दछु ।’