कर्णालीमा सहमति जुटाउन माओवादी-एमालेका शीर्ष नेताबीच छलफल

सुर्खेत । कर्णालीमा देखिएको विवाद समाधान गर्न नेकपा माओवादी र एमालेका शीर्ष नेताहरुबीच बैठक बसेको छ । सत्ता गठबन्धन दलबीच भएको केन्द्रीय सहमतिअनुसार उनीहरुबीच छलफल भएको हो ।

मंगलबार मुख्यमन्त्री राजकुमार शर्माको निवासमा दुई शीर्ष नेताहरुबीच बैठक बसेको हो ।

कर्णाली सरकारको नेतृत्व नेकपा एमालेले लिने सहमति भएपछि कर्णालीमा माओवादी असन्तुष्ट देखिएको थियो ।

सत्ता गठबन्धन दलबीच भएको केन्द्रीय सहमतिअनुसार कर्णालीमा नेकपा (एमाले) ले नेतृत्व गर्ने भएको हो । तर, मुख्यमन्त्री शर्माले भने विश्वास मत लिने अडानमा नै छन् ।

यस्तै, उक्त बैठकमा मुख्यमन्त्री राजकुमार शर्माले विश्वासको मत लिने या नलिने भन्ने बारेमा पनि छलफल भइरहेको नेकपा माओवादी संसदीय दलका प्रमुख सचेतक रनसिंह परियारले बताए ।

उनका अनुसार मुख्यमन्त्री शर्माले बैठकमा जसरी पनि विश्वासको मत लिने भनेर अडान राख्दै आएको सचेतक परियारले जानकारी दिए ।

‘विश्वासको मत सकिएपछि मुख्यमन्त्री शर्माले पछि अगाडि बढ्ने भन्नुभएको छ’, उनले भने, ‘अन्य नेताहरुले केन्द्रको भावना अनुसार नै अगाडि जाउँ भन्ने छन् ।’

बैठकमा नेकपा माओवादीका तत्कालीन मुख्यमन्त्री महेन्द्रबहादुर शाही, प्रदेश इन्चार्ज कालीबहादुर मल्ल र मुख्यमन्त्री शर्मासहितका नेताहरु रहेका छन् भने नेकपा एमालेबाट संसदीय दलका नेता यामलाल कँडेल प्रदेश इन्चार्ज लेखराज भट्ट सहितका नेताहरु मुख्यमन्त्री निवासमा २ बजेदेखि छलफलमा जुटेका छन् ।

मंगलबार बिहान मुख्यमन्त्री शर्मा र एमाले नेता यामलाल कँडेलबीच एक घण्टा छलफल भएको थियो । छलफलमा कुनै निष्कर्ष आउन नसकेपछि पुन बैठक बसेको थियो ।