क्यूएफएक्ससँग थप दुई हल आबद्ध, देशभर पर्दा संख्या ३६ पुग्यो

काठमाडौं । देशको सबैभन्दा ठूलो मल्टिप्लेक्स चेन ‘क्यूएफएक्स’ सँग थप दुई हल आबद्ध भएका छन् ।

क्यूएफएक्ससँग दरबारमार्गस्थित राइजिङ मलको क्युज हल र सामाखुसीको निर्माणाधीन सिटी स्क्वायर मलको हल जोडिएका हुन। यी दुवै हलको व्यवस्थापन अब क्यूएफएक्सले गर्नेछ ।

क्यूएफएक्सले विज्ञप्ति जारी गर्दै थप दुई हल आबद्ध भएको जानकारी गराएको हो । दर्शकले नयाँ हलमा पनि मोबाइल एपबाट अनलाइन टिकेटिङ र अनलाइन फुड खरिद गर्न सक्ने विज्ञप्तिमा उल्लेख गरिएको छ ।

सम्झौतापछि अब क्युज हलको नाम ‘क्यूएफएक्स राइजिङ मल’ हुनेछ भने सामाखुसी चोकको हलको नाम ‘क्यूएफएक्स सिटी स्क्वायर’ हुनेछ । राइजिङ मलको हललाई दुई साताभित्र क्यूएफएक्सले सञ्चालन गर्नेछ भने सिटी स्क्वायरको हल वैशाखभित्र सञ्चालनमा ल्याउनेछ ।

थप दुई हल आबद्ध भएपछि काठमाडौंमा क्यूएफएक्स हलको संख्या ७ र बाहिर ८ पुगेको छ। भने देशभर क्यूएफएक्स सिनेमाजको पर्दा संख्या ३६ र हल संख्या १५ पुगेको छ ।