नयाँ बानेश्वरमा ६ वर्षे बालकको चित्रकला प्रदर्शन

काठमाडौं । आरभ बन्धु थापा ६ वर्षका भए । पढ्छन् ‘युकेजी’मा । यही शनिवार उनको परीक्षाको नजिता आयो । उनी प्रथम भए ।

चेल्सी वर्ल्ड स्कुलका स्कुले उनी कक्षामा पढ्ने लेख्ने कुरामा शनिवार प्रथम भए । आइतबार चित्रकला प्रदर्शनी गर्ने छात्रको रूपमा प्रथम । आज उनको एकल चित्रकला प्रदर्शन भयो ।

काठमाडौंको नयाँ बानेश्वरस्थित उमोजा क्याफेमा उनको एकल चित्रकला प्रदर्शन भएको हो । प्रदर्शनीमा उनले बनाएका २५ चित्रकला राखिएको छ ।

चीनको कैलाश पर्वतदेखि उपत्यकाका मठ मन्दिर दरबार क्षेत्र र विभिन्न जात्राका चित्रकला उनले समेटेका छन् । भक्तपुरका उनले भक्तपुरलाई पनि ध्यानमा राखेर चित्रकला बनाएका छन् ।

बिस्कट जात्रा, न्यातपोल मन्दिर, तलेजु मन्दिर, नवदुर्गा देशघर, भक्तपुर दरबार क्षेत्र र शिलु महादेव लगायतका सम्पदाहरू उनले भक्तपुरबाट समेटेका छन् ।

नेपाल प्रेससँग कुरा गर्दै दौरा सुरुवाल, भादगाउँले टोलीमा सजिएका आरभले आफूले कुनै चित्र हेरेर र कुनै कल्पना गरेर बनाएको बताए । कहिलेबाट चित्रकलामा रुचि बढेको भन्ने सवालमा उनले भने, ‘१ वर्ष हुँदाबाट ।’