यसरी भएको थियो राजेन्द्र महतोको प्रदर्शनमा प्रहरीमाथि आक्रमण, धार्मिक पहिरनमा प्रदर्शनकारी (भिडिओ)

काठमाडौं । काठमाडौंको भद्रकालीमा शनिबार प्रहरीमाथि प्रदर्शनकारीले आक्रमण गरेपछि स्थितिले उग्र रूप लिएको पाइएको छ । काठमाडौं प्रहरी प्रवक्ता नवराज अधिकारीले प्रदर्शनकारीको आक्रमणबाट प्रहरी जवान रामसिंह बोहराको नाकको हड्डी भाँचिएको बताए ।

‘उहाँलाई आईसीयूमा राख्नुपरेको थियो’, एसपी अधिकारीले भने ।

राजेन्द्र महतोको नेतृत्वमा ‘बहुल राष्ट्र घोषणा गर’लगायतका माग राखेर विभिन्न जातीय र धार्मिक समुदाय सम्मिलित समूह बसन्तपुरबाट प्रदर्शन गर्दै अगाडि बढेको थियो ।

‘निषेधित क्षेत्र नतोडी शान्तिपूर्ण प्रदर्शन गर्ने भन्नुभएको थियो । तर, भद्रकाली आइपुगेपछि उहाँहरू सिंहदरबारतिर प्रवेश गर्न खोजे । त्यसपछि रोक्न खोज्दा एक्कासि आक्रमणमा उत्रिनुभयो । हाम्रै साथीहरू गम्भीर घाइते भएपछि केही बल प्रयोग गर्नुपर्ने अवस्था आएको  हो’, एसपी अधिकारीले भने ।

उनले प्रदर्शनकारीमा बाैद्ध समुदाय पनि भएकोले स्थिति नियन्त्रणमा लिने क्रममा भएको बल प्रयोगलाई दुष्प्रचार गरिएको गुनासो गरे ।

‘त्यहाँ बल प्रयोग गर्नुपर्ने अवस्था थियो । किनभने उहाँहरू उग्र भएर हाम्रा प्रहरी साथीहरूमाथि निर्मम आक्रमण गरिरहनु भएको थियो’, एसपी अधिकारीले भने ।