राजेन्द्र पाण्डेको टिप्पणी: प्रचण्ड–ओलीले गठबन्धनको जरा काट्न थाले, देशभरि समस्या सिर्जना हुन सक्छ

काठमाडौं । नेकपा एकीकृत समाजवादीका उपाध्यक्ष राजेन्द्र पाण्डेले प्रधानमन्त्री पुष्पकमल दाहाल प्रचण्ड र एमालेका अध्यक्ष केपी शर्मा ओली सुदूरपश्चिम प्रदेश नेतृत्वको सरकारको नेतृत्व आफूहरूलाई दिने सहमति फेरेर गठबन्धनको जरा काट्न सुरु गरेको टिप्पणी गरेका छन्।

प्रधानमन्त्री प्रचण्ड र ओलीले नेकपा एसलाई आफ्नो पार्टीको ब्रान्च अफिसजस्तो व्यवहार गरेकाले सुदूरपश्चिमको मुख्यमन्त्रीमा कांग्रेस समर्थित गठबन्धनको पक्षमा उभिएको बताए।

उनले नेपाल प्रेससँग भने- हाम्रो अध्यक्ष प्रचण्ड र ओलीजीले गएको १९ गते सुदूरपश्चिम प्रदेशको नेतृत्व तपाईंहरुलाई भनेर घोषणा गरेका थिए। तर, त्यो कुरा कार्यान्वयन गर्नुको सट्टा सुदूरपश्चिमको मुख्यमन्त्री रञ्जिताजीको पार्टीलाई भनेर घोषणा गर्नुभयो। त्यसपछि हाम्रो अध्यक्षले एक दिन दिने अर्को दिने नदिने पटक पटक कुरा फेर्ने दुई वटा पार्टी मिल्ने हामीमाथि शासन गर्ने, समाजवादी पार्टी उहाँहरूको ब्रान्च अफिस होइन। ब्रान्च होइन। उहाँहरूले आफ्नो ब्रान्चलाई निर्देशन दिएझैँ गरेर दिनुभयो। त्यसपछि अध्यक्ष कमरेडले चित्त बुझाउनुभएन। त्यो निर्णयको आपत्ति जनाएर बालुवाटारबाट फर्केपछि सुदूरपश्चिमका साथीहरूलाई यस्तो व्यवहार भयो भन्ने सुनाइदिनुभयो त्यसपछि उहाँहरूले आफैँ निर्णय लिनुभयो।

आफूहरू नयाँ ढंगले अघि बढेपछि प्रधानमन्त्री प्रचण्ड र ओलीसँग त्यसबारेमा थप छलफल नभएको बताए।

उनले भने- सुदूरपश्चिम प्रदेश सरकार बनाउने विषयमा ओली र प्रचण्डजीले जे व्यवहार देखाउनुभयो। त्यो व्यवहारले देशैभरि समस्या सिर्जना हुनसक्छ भन्ने कुरा उहाँहरूले सोच्नुभएन जस्तो लाग्छ।

भनेपछि यही समीकरण अनुसार अब अन्य प्रदेशदेखि केन्द्रसम्मै आउन सक्छ ? भन्ने जिज्ञासामा उनले थपे- हामी नयाँ ढंगबाट अगाडि बढेपछि माओवादी र एमाले सन्चो मानेर बस्यो भने केन्द्रको छुट्टै तल छट्टै ढंगबाट चल्न सक्छ। उहाँहरूले सन्चो मान्नुभएन भने कुरा नयाँ ढंगबाट जान्छ। जरा काटेपछि रुखको टुप्पोको पात आफैँ सुक्छ। त्यसैले गठबन्धनको जरा काट्न सुदूरबाट सुरू भयो।

नेकपा एस नयाँ ढंगले अघि बढेपछि मधेश, बागमती र लुम्बिनी प्रदेशमा पनि सरकार फेरिन सक्छ । त्यसो त नेकपा एसका अध्यक्ष माधव नेपाललाई संघ र प्रदेश सबैतिर कांग्रेससँग मिल्न दबाब बढिरहेको छ । कोशीमा नेकपा एसले गठबन्धनबाट विद्रोह गरेपछि ओलीले नेकपा एसलाई दक्षिणपन्थी अवसरवादी चरित्र नांगो ढंगले प्रकट गरेको आरोप लगाइसकेका छन् ।