२ खेल खेलेका अनिल र ३ खेल खेलेका सागरले बनाए विश्वकप टोलीमा स्थान

काठमाडौं । आसन्न टी–२० विश्वकपका लागि घोषणा गरिएको नेपाली टोलीमा स्थान बनाएका अनिल शाह र सागर ढकाल कम अनुभवी खेलाडी हुन् । टी–२० अन्तर्राष्ट्रिय क्रिकेटमा अनिलले केवल २ खेल खेलेका छन् ।

त्यसमा उनले एक खेलमा मात्र ब्याटिङ गर्न पाएका थिए र २३ रन जोडेका थिए । एकदिवसीय अन्तर्राष्ट्रिय क्रिकेटमा भने उनले १० खेलमा एक सतक र दुई अर्धशतकसहित २ सय ६६ रन जोडेका छन् । उनी टोलीमा विकेटकिपर आसिफ शेखका विकल्प हुनेछन्। अनिल पनि विकेटकिपर हुन् ।

गत फेब्रुअरीमा भएको एकदिवशीय अन्तर्राष्ट्रिय खेलमा क्यानडाविरुद्ध एक सतक र एक अर्धसतक तथा नेदरल्यान्ड्सविरुद्ध एक अर्धशतक बनाएपछि अनिल विश्वकपका लागि स्थान बनाउने होडमा देखिएका थिए । २०१८ मा दुईवटा र सन् २०२२ मा दुईवटा एकदिवशीय अन्तर्राष्ट्रिय खेल खेलेका अनिलले सन् २०२४ मात्र यो फर्म्याटका ६ खेल खेलेका छन् ।

सन् २०१८ मा पहिलो टी–२० अन्तर्राष्ट्रिय खेलेका उनलाई त्यसपछि दोस्रो टी–२० अन्तर्राष्ट्रिय खेल्न झन्डै ६ वर्ष लागेको थियो । नेपाली टोलीका अर्का कम अनुभवी खेलाडी हुन् स्पीनर सागर ढकाल । सागरले हालसम्म ३ वटा मात्र टी–२० अन्तर्राष्ट्रिय खेलेका छन् । त्यसमा उनले १ विकेट लिएका छन् । यस्तै एकदिवसीय अन्तर्राष्ट्रिय क्रिकेटमा ८ खेल खेलेका उनले ४ विकेट हात पारेका छन् ।

सन् २०२२ को फेब्रुअरीमा दुईवटा टी–२० अन्तर्राष्ट्रिय खेलेका उनले तेस्रो खेल भने गत मार्चमा खेलेका थिए । एकदिवसीय अन्तर्राष्ट्रियमा उनले सन् २०२२ को मार्चमा डेब्यु गरेका हुन्। उनले त्यसै वर्ष ८ वटा एकदिवसीय अन्तर्राष्ट्रिय खेल खेलेका थिए ।

विश्वकप टोलीमा परेका प्रतिस जिसीले १० टी–२० अन्तर्राष्ट्रिय खेल खेल्दै ८ विकेट लिएका छन् । उनको इकोनोमी ८.०८ छ। उनले गत अक्टोबरमा मात्र टी–२० अन्तर्राष्ट्रियमा डेब्यु गरेका हुन् । उनी मिडियम पेसर हुन् । उनले ३ वटा एकदिवसीय अन्तर्राष्ट्रिय खेलेका छन् ।

कमलसिंह ऐरीले पनि १० टी–२० अन्तर्राष्ट्रिय १५ विकेट लिएका छन् ६.४९ को इकोनोमीसहित । उनले ३ वटा एकदिवसीय अन्तर्राष्ट्रिय खेल्दै २ विकेट हात पारेका छन्। उनी पनि मिडियम पेसर हुन् । कमलले सन् २०२२ को अप्रिलयता टी–२० अन्तर्राष्ट्रिय खेल खेलेका छैनन् ।