बुद्धमय बन्यो खयरडाँडा

रुपन्देही । रुपन्देहीको देवदहमा सञ्चालित दुई दिने क्यानभासमा ऐतिहासिक देवदह कार्यशाला शनिबार सकिएको छ ।

कार्यशालाको समापन कार्यक्रममा लुम्बिनीको उद्योग, पर्यटन तथा सहकारी मन्त्री खड्ग बस्नेतले यस्ता कार्यशालाले पर्यटन प्रबर्द्धनमा ठूलो टेवा दिने बताउँदै कलाकारहरुले निकै मेहनतका साथ बुद्ध र देवदहको इतिहास उतारेको जनाए ।

उनले यसका लागि प्रदेश सरकार सहकार्य गर्न इच्छुक रहेके बताए । २५६८ औं बुद्धजयन्तीको पूर्वसन्ध्यामा ड्रिम देवदह यूनिटि फर चेञ्जको आयोजनामा दुई दिने कार्यशाला गरिएको हो ।

लुम्बिनी प्रदेशसभा सदस्य जानकी न्यौपानेले देवदह बुद्धको मावलीस्थल भएकाले यहाँको विकासका लागि कार्यशालाले ठूलो सहयोग गर्ने बताइन् । यस्तै कार्यक्रममा देवदह नगरपालिकाका उपप्रमुख विद्यालक्ष्मी गुरुङले खयरडाँडाजस्ता पुरातात्विक स्थलमा गरिएको कार्यशालाले देवदहको प्रवर्द्धनमा ठूलो टेवा दिने बताउँदै स्थानीय सरकारका तर्फबाट यसको संरक्षणमा ध्यान दिने बताइन् ।

यस्तै लुम्बिनी विकास कोष कोषाध्यक्ष सिद्धिचरण भट्टराईले देवदहको इतिहासलाई क्यानभासमा उतार्ने कार्यले देवदहको पर्यटन प्रवर्द्धनमा महत्त्वपूर्ण टेवा पुग्ने बताए । आयोजक ड्रिम देवदह यूनिटि फर चेञ्जका अध्यक्षसमेत रहेका भट्टराईले कलाकारहरुले उतारेका ऐतिहासिक चित्रहरुले देवदह र बुद्धको जीवनलाई उतारेको उनले बताए ।

यस्तै समापन कार्यक्रममा देवदह नगरपालिकाका पूर्व नगरप्रमुख हिराबहादुर खत्री, वडाअध्यक्ष मोहन बहादुर जिसी, नेपाल ललित कला प्रज्ञा प्रतिष्ठानका प्रज्ञा गोविन्दगोविन्द चौधरी, खयरडाँडा संरक्षण समिति देवदह ९ का सल्लाहकार पिताम्बर खराल, सचिव दिपेश बस्याल, पवन पौडेललगायतले बोलेका थिए । २४ जना कलाकारले क्यानभासमा उतारेका चित्रहरुमा देवदहको इतिहास कोरिएको छ ।

२ दिने कार्यशालाबाट बनेका २४ वटा चित्रहरुलाई व्यवस्थित रुपमा राख्ने ड्रिम देवदह यूनिटि फर चेञ्जका सचिव दिपेश बस्यालले जानकारी दिए । ड्रिम देवदहको आयोजना, नेपाल ललितकला प्रज्ञा प्रतिष्ठानको सहकार्यमा भएको कार्यशालाको देवदह नगरपालिका संरक्षक, पर्यटन डिभिजन कार्यालय रूपन्देही सहआयोजक र लुम्बिनी विकास कोष प्रर्वद्धक हुन् ।

कार्यशालाको शुक्रबार लुम्बिनी प्रदेशका महिला बालबालिका तथा जेष्ठ नागरिक मन्त्री भगवती अधिकारीले कार्याशालाको उद्घाटन गरेकी थिइन् ।