मादक पदार्थ सेवन गरी वृद्ध दम्पतीमाथि निर्घात कुटपिट

सिन्धुपाल्चोक । घरमा बसिरहेका बेला वृद्ध दम्पतीमाथि मादक पदार्थ सेवन गरी आएका युवाहरूले निर्घात कुटपिट गरी फरार भएका छन् ।

सिन्धुपाल्चोक लिसंखु पाखर–१ डाँसेका स्थानीय ७४ वर्षीय निमादोर्जे तामाङ र उनको श्रीमती वर्ष ६४ की दावा डोल्मु तामाङ लाई मादक पदार्थ सेवन गरी आएका स्थानीय दुई युवा श्याम लामा र पदम लामाले कुटपिट गरी फरार भएका हुन् ।

युवाका कुटपिटबाट घाइते दुवैको बी एन्ड बी अस्पतालमा उपचार भइरहेको छ । वृद्धालाई कुटपिटपछि साथमा भएको नगद ५० हजार र कानमा लगाएको एक तोला सुन समेत लुटेर लगेको घाइतेका छोरा दावा लामाले जानकारी दिए ।

वैशाख २९ गते स्थानीय श्याम लामा र पदम लामा विवाहको निम्तोका लागि गाउँमा गएका थिए । बेलुकी भएपछि मादक पदार्थ सेवन गरेर अश्लील बोल्दै हिँडेपछि गाउँका स्थानीयले अश्लील नबोल्न अनुरोध गरेका थिए ।

घरमा खाना खादै गर्दा आफ्नो बुबालाई एक्कासि गएर निर्घात कुटपिट गरेको घाइतेका छोरा दावाले जानकारी दिए ।

‘बेलुकी मेरो बुबा र आमा घरमा खाना खादै गर्दा उनीहरू आएर बुबा माथि कुटपिट गर्न सुरु गरेछन् । आमाले किन कुटेको भन्दा आमालाई पनि कुटेर च्यापु नै भाँचिदिएछन्’ दावाले भने ।

घाइते तामाङको टाउकोमा १७ टाका लगाइएको छ भने उनको श्रीमतीको आइसियुमा राखेर उपचार भइरहेको छ ।

घटना लगतै लिसंखुमा रहेको प्रहरीलाई खबर गरे पनि प्रहरीले वास्ता नगरेको घाइतेका छोरा दावाले बताए ।

जिल्लाको प्रहरीले वास्ता नै नगरेपछि केन्द्रमा भने पछि मात्रै प्रहरीहरू घटनास्थलमा पुगे पनि अहिलेसम्म कुटपिटमा संलग्नहरुलाई पक्राउ नगरिएको उनले बताए ।