कांग्रेसको दाबी- संसदीय छानबिन समिति बनाउने प्रधानमन्त्रीको प्रतिबद्धता छ (भिडिओ)

काठमाडौं । नेपाली कांग्रेसका प्रमुख सचेतक रमेश लेखकले सहकारी काण्ड सम्बन्धमा प्रधानमन्त्री पुष्पकमल दाहालले संसदीय छानबिन समिति बनाउने प्रतिबद्धता जनाएको दाबी गरेका छन् ।

मंगलवार प्रतिनिधिसभाको बैठक अवरोधपछि सञ्चारकर्मीहरुसँग कुरा गर्दै प्रमुख सचेतक लेखकले प्रधानमन्त्री दाहालले संसदीय छानबिन समिति बनाउने बताउनुभएको दाबी गरेका हुन् ।

उनले नेपाली कांग्रेससँग प्रधानमन्त्री दाहालले राष्ट्रपति रामचन्द्र पौडेललाई नीति तथा कार्यक्रम प्रस्तुत गर्न दिन आग्रह गर्नुभएको र आफूले संसदीय छानबिन समिति बनाउन कोसिस गर्ने र समिति बनाउने काममा लाग्ने प्रतिबद्धता जनाउनुभएको बताए ।

‘प्रधानमन्त्रीजीले नीति तथा कार्यक्रम राष्ट्रपतिजीलाई सम्बोधन गर्न दिनुस्, मैले यहाँ समिति बनाउने कोसिस गर्दछु भन्ने प्रतिवद्धता गर्नुभएको हो’, उनले भने, ‘समिति बनाउने काममा लाग्छु भन्ने प्रतिबद्धता गर्नुभएको हो । जबसम्म संसदीय छानबिन समिति बन्दैन, हामी सरकारी काममा प्रवेश गर्दैनौं ।’

प्रमुख सचेतक लेखकले नीति तथा कार्यक्रमले मुलुकको अर्थतन्त्र अघि बढाउने ठोस नीति लिन नसकेको जिकिर गरे ।